Angallammut allamut usingiarneq ima paasineqassaaq; angallammi pisat tunisassialluunniit tamakkerlugit ilaannakortumilluunniit angallammut allamut nuunneqartut.
Taamaalilluni pineqartoq tassaavoq, pisanik taakkunanngaluunniit tunisassianik angallammit tunniussisumit angallammut tigusisumut nuussineq, tigusisullu aalisakkat imaluunniit aalisakkanit tunisassiat assartorlugit ingerlateqqissavai. Taamaalilluni tunisineq pineqanngilaq, nuussinerinnarli pineqarluni.
Kalaallit Nunaanni angallammut allamut usinik nuussiniaruit piumasaqaatit tullinnguuttumiittut naammassisimassavatit:
- Kalaallit Nunaata imartaani aalisakkanik aalisakkanillu tunisassianik nuussinnginnermi usinik nuussinissamut immikkut akuersissummik Aalisarnermut Piniarnermullu Naalakkersuisoqarfimmut qinnuteqartoqaqqaassaaq.
- Angallat pisanik taakkunanngaluunniit tunisassiannik nuussiffiginiagaq nunarsuup immikkoortuani aalisarnermut aqutsinermut suleqatigiiffimmi NAFO-mi (Atlantikup avannaata kitaani aalisarnermut aqutsinermut suleqatigiiffimmi) imaluunniit NEAFC-imi (Atlantikup avannaata kangiani aalisarnermut kommissionimi) nunamit ilaasortaasumeersuussaaq, nunameersuussalluniluunniit ilaasortaanngitsutut suleqataasumeersoq.
- Angallat NAFO-mi NEAFC-imiluunniit nalunaarsorsimassaaq, angallallu naalagaaffimmit attavigisaminiit angallammit allamit usingiaaffigineqarnissaminut akuerisaassaaq. Taamaaliornikkut isumannaarneqassaaq inatsisitigut pisussaaffigisamik alapernaarsuinermut atortuutinik angallammiittoqarnissaa, kiisalu naalagaaffiup oqartussaasup (naalagaaffiup erfalasoqarfiup) alapernaarsuinermi sumiissusersinermik Kalaallit Nunaanni Aalisarsinnaanermut Akuersissutinik Nakkutilliisoqarfimmi angallatinik alapernaarsuinermut aaqqissuussinermut suliaqarfianut (FMC-mut) ingerlatitseqqissinnaanera.
- Uani nunat ilaasortaasut aamma nunat ilaasortaanngitsutut suleqataasut allatorsimaffiat nassaarisinnaavat https://www.neafc.org/ imaluunniit https://www.nafo.int/About-us/Overview-of-NAFO
Kalaallit Nunaata imartaani angallatit akornanni aalisakkanik aalisakkanillu tunisassianik usingiannginnermi usinik nuussinissamut Aalisarnermut Piniarnermullu Naalakkersuisoqarfimmit immikkut akuersissummik qinnuteqartoqassaaq.
Angallat tunniussisussaq angallallu tigusisussaq ilanngullugit qinnuteqassaatit. Angallammut tunniussisussamut ataatsimik akuersissummik tunniussisoqassaaq – tassa angallammut aalisakkanik tunniussisussamut akuersissullu ataaseq angallammut aalisakkanik tigusisussamut tunniunneqassalluni.
Una toorlugu angallammut allamut usingiarnissamut qinnuteqarit
- Qinnuteqaat Aalisarnermut Piniarnermullu Naalakkersuisoqarfimmut nassiunneqassaaq, taassumalu qinnuteqaatip tiguneqarneranik uppernarsaat nassiutissavaa. Qinnuteqaativit suliarineqarnissaanut paasissutissat amigarpata, attavigineqarumaarputit.
- Angallatit pillugit paasissutissat Aalisarnermut Piniarnermullu Naalakkersuisoqarfiup misissussavai, kiisalu piumasaqaatinut naammassinnissimanersut misissorlugu.
- Angallatinut marluusunut (tunniussisumut tigusisumullu) nuussinermut Aalisarnermut Piniarnermullu Naalakkersuisoqarfik akuersissusiussaaq imaluunniit itigartitsilluni.
- Nuussinermut atatillugu alapernaarsuisumik nakkutilliisumilluunniit angallammiittoqarnissaa Kalaallit Nunaanni Aalisarsinnaanermut Akuersissutinik Nakkutilliisoqarfimmit piumasarineqarsinnaavoq.
- Suliamik ingerlatsineq sapaatip akunneranik ataatsimik marlunnilluunniit sivisussuseqartarpoq.
Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarnissarnut tikilluaqqusaavutit.
Ukioq kaajallallugu allamut usingiarnissamut qinnuteqarsinnavutit.
Oqartussat aalajangeeriaasiat aallaaviatigut naammagittaalliutigisinnaanngilat. Qinnuteqaatit akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut Piniarnermullu Naalakkersuisoqarfimmut naammagittaalliorsinnaavutit, taassumalu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku piaarnerpaamik naammagittaalliuutit Aalisarnermut Piniarnermullu Naalakkersuisoqarfimmut nassiutissavat.
Naammagittaalliuutit allakkatiguussaaq aamma sooq sunalu pillugu naammagittaalliuuteqarnerlutit allassavat. Eqqaamajuk naammagittaalliuutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.
Aalisarnermut Piniarnermullu Naalakkersuisoqarfiup naammagittaalliuutit nalilersussavaa suliarlu ilinnut tunngasoq ingerlanneqareerpat attavigineqarumaarputit.