Sikumi sukuutserneq qasujaallisaatitut, eqqissisimaarutitut imaluunniit soorlu ishockey-erluni unamminertut, nunani assigiinngitsorpassuarni ukiuunerani ileqquusumik sammineqartarpoq. Nunani issittuni arlaqartuni, sukuutsertarneq ileqqunut ilaavoq. Tamatumani pingaarnertut ukiup annersaani pissusissamisuuginnartumik sikuusarluni ukiuusarneranik patsiseqarpoq.
Kalaallit Nunaanni ukiup annersaani sikuusaraluartoq, sukuutsertarneq nalinginnaanngilaq.
- Tamatumani apisarnerata kingunerisaanik sukuutsertarfiup aserfallatsaalineqarnissaanut piumasaqaatit, ilisimasat atortussallu killeqarneri patsisaasinnaapput, taama sukuutsertarfimmi suliniummik aqutsisoq Martin Kotol oqarpoq.
- Sikumi sukuutsertarneq (timersuutillu assigisaat) Kalaallit Nunaannut eqqunneqarsinnaasut upperaarput. Taamaattoqassappat pingaartumik meeqqanut inuusuttunullu ukiuunerani sammisassatut neqeroorutigineqarsinnaasut amerlissagaluartut oqarpoq.
Iluatsitsilluarneq
Sikumi sukuutsertarfik maanna qaammat sinnilaarlugu atorneqareerpoq, atuisartullu ikigisassaanatik.
- Aallaqqaammut atuisut meeraanerupput, kisianni kingullertigut ilaqutaariit aamma inuusuttuaqqat atuisunut ilanngupput. Oqaannarsinnaavunga iluatsilluartorujussuusoq, Martin Kotol oqarpoq.
Sukuutsertarfik ammatinniarlugu suliarujussuuvoq nukimmik aningaasanillu atuinarluni.
- Aputaajaaneq, qaapiaaneq, atortut aserfallatsaalinerat sulialersuutaavoq. Kisianni isumaqarpugut tamanna eqqortuliornerusoq, Martin Kotol nangippoq.
Suliamik suliaqartut ukioqqinnissaanut aningaasanik taperneqarluaqqissinnaagunik pitsanngorsaatissanik pilersaarusiulereerput.
Sukuutsertartoqatigiit, atuartut sukuutsertittarnissaat, sukuutsunik sukkaniunneq, hockey, unnukkut unnuakkullu sukuutsersinnaanerit ilaatigut eqqarsaatigineqartunut ilaapput.
- Filosofeerput ajornanngitsuararsuuvoq: ukiup ingerlanerani qaammatini arfineq marlunni sikoqartarpoq, soormi nunani issittuni allamisullu pikkoritsigilernissarput anguniarutsigu, Martin Kotol naqissusiivoq.
Suliniummut aqutsisut Martin Kotol aamma pingaartumik Center for Arktisk Teknologi-mi ingeniørinngornianit nammineq kajumissutsiminnik ikiuuttunit ingerlanneqarpoq. Suliniummut peqataasut tamarmik namminneq kajumissutsiminnik suleqataapput.
Maniitsoq Marathon, sakkortuunermik unammisitsineq, qajarissamik ingerlaqatigiineq qaqqakkullu unamminerit taasassat ilaannaraat Maniitsoq Extreme Sportip Qeqqata Kommuniata Atuilluartuunissamik aningaasaateqarfianit 25.000 kroninit taperneqarnermi kingorna angusimasaaniit.
Inuit amerliartuinnartut arpannernut pisuttuarnernullu peqataanissartik soqutigigaluttuinnarpaat.
- Tamanna avatangiisitta atorluarnerulerneranik kinguneqarpoq. Naatsumik oqaatigalugu taperneqarnermut inunnut amerlasuunut atorluarneqarpoq, taama oqarpoq John Olsen Maniitsoq Extreme Sportimiit.
Maniitsoq Extreme Sporti siunissamut arlalinnik pilersaaruteqarpoq. Assersuutigalugu ulloq ataaseq atorlugu 70 kilometerinik ingerlaarneq, qajartorluni, cykelerluni arpallunilu, Maniitsoq Marathon pilersaarutillu allat suli saqqummiunneqanngitsut.
Assagiarsunnik qalipaajaanermit, peqqinnissaq pillugu oqalugiarnerit iganermik takutitsinermut Nerisa Foodfestivalertitsinermi ilaatigut sammineqarput.
Atuilluartuunissaq pillugu suliniutinit tapiiffigineqartut, Nerisa foodfestival 2013-imi aningaasatigut tapiiffigineqarneratigut ilagaat.
Nunatsinni pissarititat atorlugit atuilluartumik qanoq kultureqarsinnaanersugut foodfestivalimi sammineqarpoq. Festivali ulluni marlunni Sisimiuni kulturikkut illorsuarmi Taseralik-mi ingerlanneqarluni, innuttaasullu 400-nik sinneqartut peqataaffigisaat iluatsilluartumik ingerlanneqarpoq.
Iggarinnerpaatut toqqagaanikoq Inunnguaq Hegelund Nerisa Foodfestivalimi ilaatigut igasinneqarpoq, peqqinnissaq pillugu oqalugiartoqarpoq, assagiarsunnik qalipaajaanermik unammisitsisoqarpoq, minnerunngitsumillu peqataasunut tamanut mamartorsuarnik tamulugassaqartitsisoqarluni; ulluni marlunni foodfestivalertitsisoqarnerani pisut ilamininngui eqqaaginnarlugit.
Inuusuttut piumassuseqarluartut marluk, igasutut ilinniarsimasoq Åge Lennert Olsen aamma Melissa Geisler Krogsgaard, foodfestivalertitsinissamik aaqqissuisuupput, atuilluartuunissaq pillugu suliniutinut aningaasatigut tapiiffigineqarnissaminnillu qinnuteqarnikuullutik.
Nerisa Food Festival 2013
URBAN GREENLAND, 2014-imi siullermeertumik Kalaallit Nunaanni niviarsiaqqanut skateboard camp-ertitsipput.
Skateparken - tarnikkut timikkullu iluaqutaasinnaasumik - niviarsiaqqat aamma ilinniarfigisinnaagaat, skateparken-ip siunertaraa.
Urban Greenlandip naliliinera malillugu nivissat amerlasuut isumaqarput skatebordimut campertitsineq ajugaalluni misiginartuusoq, peqataasullu 93 procentiisa skateboardernermut pikkorissisimallutik isumaqarput.
Ukkanneqartut ilagaat ataatsimoorneq.
Campip ingerlanerani immitsinnut ikiortorujussuanngorpugut, peqataasullu angajulliit nuannaartorilerpagut, peqaasut nukarliit ilaat Urban Greenlandimut oqarpoq.
Niviarsiaqqat qulingiluanit 13-it tikillugit ukiullit katillugit 40-t, Sisimiuni Nalunnguarfiup Atuarfiata eqqaani skatertarfimmi ingerlanneqartumi skate camp-imut peqataapput.
Niviarsiaqqat gruppinut marlunnut avinneqarlutik, gruppit tamarmik sapaatip akunnera ataaseq skateboardernermik ilinniartinneqarput, aammali ilaatigut sungiusartilluni peqqinnartunik nerisaqarnissamik ilitsersorneqarlutik.
Skateboard-erneq uagutsinnut ilinniarfiuvoq – anguniagaqarnissamut sakkussaq. Inuusuttut Skateboard-imik misiligaanermikkut, sapiisertarnermikkullu piginnaasaminnik pikkoriffigisaminnillu nassaarsinnaasartut upperaarput, taama URBAN GREENLAND-imit Natalie Genet oqarpoq.
Skate Campernermi inersimasut nammineq kajumissutsiminnik peqataasut arfineq-marluk qulillu akornanni maligassiuisutut peqataallutik pingaarnertut akisussaaffeqarlutik peqataapput, soorluttaaq illoqarfimmiut niviarsiaqqat tallimat maligassiuisutut, ilinniutigineqartullu attatiinnarneqarnissaannik ingerlaannarnissaannillu qulakkeerinnittussatut peqataasut.
Maniitsumi sisorartartut MS-89-ermiut maluginiarpaat, ukiut kingulliit ingerlanerini ujakkaarnermik soqutigisallit amerliartuinnartut, taamaakkaluartorli arlaqartut sisoraatisiniarnissaminnut periarfissaqanngitsut.
Taamaattumik sisoraatinik attartortittagassanik pissarsiniarnissaminnut Qeqqata Kommuniata atuilluartuunissaq pillugu suliniutaanut qinnuteqarsimapput.
MS-89-ip siulersuisuinit oqaatigineqarpoq, ujakkaarnermut soqutiginninneq annertusoq, taamaattorli ujakkaarutit atortussaat ilanngullugit akisoqimmata arlaqartut pisinissaminnut akissaqanngitsut.
- Meeqqat ujakkaarnermik soqutigisaqarnerat attatiinnassallugu iluatinnarpoq, taamaattumillu ujakkaartartut arlaqartut meeqqanik ujakkaaruteqanngitsunik ikiuerusullutik sisoraatikutik Sarfat-nut qimassimallugit. Meeqqat siulliunniuttarput, tullinnguunnissaminnullu utaqqisinnaarpiartaratik, taamak MS-89-imi siulersuisunut ilaasortat oqaluttuarput.
Sisoraatit ungasinngitsunnguami Maniitsumut tikissapput MS-89-imilu siulittaasoq Finn Løvstrømip qularutiginngilaa sisoraatit attartortagassat iluatsilluarumaartut.