Ilaatigut innuttaasut nunaqarfinni aqutsisut aalisakkanillu tunisassiorfiit peqatigalugit tunitsivinnut tunisassiornermullu tunngasunik akisussaaffeqarnerulersinnerisigut, inuutissarsiutitigut suliassaqartitsinikkullu toqqammaviit inartortinneqartuassapput.
Nunaqarfiit taakku marluk pinngortitami immikkuullarissumi inissisimapput, takornarissanillu allaniillumi immikkut misigisaqarfigerusullugit pinngortitallu tunniussinnaasaannik misiliiffigerusullugit ornigarneqartarlutik.
Nunaqarfinni najugallit eqaloqarfinnut aavarnikkullu ilisimaarinnilluartuuneri tikeraanit soqutiginnittuniillu atorluarneqartarnerat periarfissaqarluarpoq. Ukioq kaajallallugu aalisarneqarsinnaasunik saarulleqarfiulluartup Niaqornap, Atammik qanittuaniippoq. Olivinisiorfik Seqi, maannakkut matoqqasoq aamma Atammiup qanittuaniippoq, nunalli immikkoortortaa tamanna aatsitassanik misissuiffigilluarneqarpoq, nunallu immikkoortortaa tamanna inuutissarsiutinik suliffissanillu nutaanik pilersitsiviusinnaasunik atortussiassanik piiaavissaqqittuusoq oqaatigineqartarpoq.
Aliikkuaralugu aalisariartitsiviulluartartumi, Napasoq kangerluup Kangianiippoq, nunallu timaani isumalluarnartumik American Nikkel Company nikkilisiorluni. Periarfissat nutaat atorluassagaanni, aalisarnerup piniarnerullu iluani pitsanngorsaaneq imaluunniit takornarissanik sullississagaanni piiaavinniluunniit sulissagaanni oqaatsit pineqaraluarpataluunniit, maannakkut ilisimasat annertusarneqarnissaat pisariaqarpoq.
Nunaqarfiit, nunaqarfinnilu aqutsisut ataasiakkaat ineriartortitsinissaminnik nunataminnilu periarfissanik atorluaanissaminnut namminneq isumaginnissinnaanissaat Kommunalbestyrelsimut pingaaruteqarpoq.