Kitaata sineriaani sisupiloorfiusinnaasut annersaat avannamut-kangiani Kangerlussuatsiaq Apussuillu aamma kujammut-kangiani Maniitsup sermia patsisaallutik timmisartorluni sisorarfiarfissatut soqutigineqarluarput.
Kangaamiut Kangerlussuup Kangerlussuatsiaallu paavini inissisimavoq. Taamak pitsaatigisumik inissisimanerata nunaqarfik aalisarnikkut piniarnikkullu pingaaruteqarpoq, takornarissanillu aliikkutaralugulu aalisartitsinissamut piniartitsinissamullu periarfissagissaarluni.
Kangerlussuatsiaq nunarsuarmi takornariartarfiit soqutiginarnerpaat ilaattut isigisassaavoq, minnerunngitsumillu umiarsuit takornariartaatinut ilaallutik takornarissat puigugassaanngilluinnartumik pinngortitamik misigisaqarfigisinnaasaat. Tamatuma saniatigut kangaamiormiut kinguaariit ukiorpaalunni eqqumiitsuliornermik inuutissarsiuteqarsimasut tikeraassallugit periarfissaqarlutik.
Aalisakkerivimmi aalisarnikkullu suliat annertusiartuinnarput, pingaartumillu saarullinnik, qaleralinnik, qeeqqanik nipisaallu (suannik) suliaqartarnerit annertusiartuinnarlutik.
Nunaqarfiup talittarfilunneratigut umiarsuit takornariartaatit, sinersortut pajuttaatillu talissinnaaneq ajorput. Erngup nukinganik nukissiuuteqalernissamut periarfissaalluartumut Tasersiamut kiisalu piiavimmut Qaqortorsuarmut Kangaamiut aamma qanittuaniippoq.
Nunaqarfiit, nunaqarfinnilu aqutsisut ataasiakkaat ineriartortitsinissaminnik nunataminnilu periarfissanik atorluaanissaminnut namminneq isumaginnissinnaanissaat Kommunalbestyrelsimut pingaaruteqarpoq.