Illoqarfeeraq Maniitsoq alutornartoq kalaalerpalaartoq inuiaqatigiinnik ataqatigiilluartunik innuttalik, suut tamarmik qanittumi inissisimasut, piffissamut malinnaasoq "illoqarfissuartut" periarfissalik.
Illoqarfik marlunnik pitsaasunik hotelleqarpoq, cafét neriniartarfiillu arlallit annissassanik sanasinnaasut.
Maniitsumi angallanneq ajornanngitsumik ingerlariaaseqarpoq, bussit akulikitsumk piffissarlu eqqorlugu angalasarmata.
Illoqarfittaaq timmisartukkut angallatitigullu ornitassanut allanut aqqutissaqarluarpoq.
Maniitsumiit timmisartukkut toqqaannartumik Nuummut, Sisimiunut Kangerlussuarmullu angalasoqarsinnaavoq.
Maniitsoq Tour Boats sapaatip akunneranut arlaleriarlunittaaq Napasumut, Atammimmut Nuummullu angalasarpoq. Periarfissaavortaaq nammineq angalarusukkaanni angallammik attartorsinnaaneq.
Pinngortitaq piviusoq misigerusukkaanni, Maniitsoq ornissallugu toqqagassaqqissuuvoq.
Aasakkut arferit sissamut qanittuararsuullutik pinnguartut qimerloorneqarsinnaapput. Taamaammat Maniitsoq ”Arferit illoqarfiattut” oqallisaasarpoq, tamannalu illoqarfimmi takussaavoq, arlalinnik arfernik qiperukkanik peqarmat.
Maniitsup sineriaa annertuumik aalisarnermi piniarnermilu ileqquusunik atuiffiusutut ilisarnaateqarpoq. Illoqarfik angisuumik atorluarneqartumik umiatsiaatileqatigiit umiatsialiviannik peqarpoq, tassangaanniillu kangerlunnut angalasoqarsinnaavoq qangalu aasarsiortarfiit arlallit misigineqarsinnaallutik. Qissattaammillu nassarnissaq periarfissaqqissuuvoq, qissattarluni aalisarfissaqqissorpassuaqarmat.
Pinngortitami soqutiginartumi sermeq iigartartumit sermersuarmiillu ilusilersukkami pisuttuarnissaq qaqqasiornissarlu periarfissatsialaapput. Ukiukkullu qaqqat portusuut sisorariarfissaqqissorujussuusarput - ingammik heliskiing nuannarineqarluartoq.
Maniitsup Katersugaasivia pulaarfissaqqilluinnarportaaq. Tassani Kalaallit Nunaata Maniitsullu oqaluttuassartaa allanngorartumik saqqummersinneqartarput, innuttaasullu eqqumiitsuliarpassui aamma qimerloorneqarsinnaallutik. Aammattaaq tammajuitsussanik pisinniarfeqarpoq.
Maniitsoq ulluunerani paaqqinnittarfeqarlunilu angerlarsimaffeqarfiuvoq. Meeqqanut inuusuttunullu ornittagaqarpoq, nipilersornermik ilinniarfeqarluni, kiisalu naluttarfimmik pilersitsisoqarnissaanik sulissuteqartoqarluni.
Maniitsumi innuttaasut sunngiffimmi sammisassanik ulikkaarput.
2019-ip aasaani Maniitsoq FIFA-mit akuerisaasumik arsaattarfittaarpoq, taamaalilluni siunissami illoqarfimmi GM-imik ingerlatsisoqarsinnaanngorluni. Taakku saniatigut ilaatigut iligiiaanut sungiusarnissanut volleyball, assammik arsarneq aamma badminton aallunneqarput, marluusunillu timigissartarfeqarluni.
Aammattaaq nipilersornermut ilinniarfik erinarsoqatigiillu, eqqumiitsuliornermillu sannaveqarluni, ujaqqanik saanernillu sanaluffiusinnaasoq.
Meeqqat atuarfiat Atuarfik Kilaaseeraq 423-nik atuartoqarpoq klassinut 28-nut agguataarneqartunik (2016-imi naatsorsuineq naapertorlugu). Nunatsinni efterskoliusut aappaat, Maniitsumi Efterskoli, 70-inik atuartoqarsinnaavoq. Aammattaaq suliffissanut, ilitsersuinernut pikkorissaqqinnernullu qitiusumik ingerlatsiveqarpoq (Majoriaq), ilaatigut inuussutissarsiutinik ilinniagaqalernermut akuerisamik isissutissiamik neqerooruteqartoq, kiisalu inuttut inerikkiartornissamik pisariaqartitsisunik tigusiffiusartumik atuarfeqarluni (Pilersitsivik).
Meeqqat atuarfiat Atuarfik Kilaaseeraq 423-nik atuartoqarpoq klassinut 28-nut avissimasunut (2016-mi kisitsisit takuuk). Kalaallit Nunaat marlunnik efterskoleqarpoq, aappaa Maniitsumi inissisimasoq Maniitsumi Efterskoli, atuartunut 70-nut inissalik. Aammattaaq Majoriaq ilinniarnermut siunnersuisarfiusoq piginnaanngorsarfiusoq tamaaniippoq, AEU (anerkendt erhvervsintroducerende uddannelse) aamma Pilersitsivik, inuusuttunut kinaassutsimikkut ineriartorusuttunut tigusisartoq, ilinniarfigineqarsinnaallutik.
Maniitsoq arlalinnik pissutsinut malinnaasunik meeqqeriveqarpoq, utoqqaallu angerlarsimaffeqarluni.
Takornariaqartitsinermut tunngatillugu arferit, timmissat, qaqqat kangerluillu Maniitsup tusaamasaassutigai. Upernaakkut, aasakkut ukiukkullu qipoqqaat tikaagulliillu takkusimaarnerusarput. Umiarsuit takornariartaatit amerliartortut Maniitsoq aqqusaartalernikuuaat, eqalunniartitsinerlu takornarianut neqeroorutitsialaavoq siunissaqartoq. Kangaamiut Maniitsullu eqqaanni qaqqat helikopteriaqqat atorlugit sisorartitsisarfissuatsialaapput, ukiuuneranilu nunarsuarmi tamanit tamaneersut Maniitsumut sisorariartarput.