Klasselærep Elisabeth Johnsen ullorsiutini iluarsaannerani, 3. klassimi atuartut eqqissillutik issiapput ullup qeqqarsiutiminnillu nerillutik.
Elisabeth Johnsen atualerlaanut 1-3. klassinut, tassalu nukarlernut ilinniartitsisuuvoq. Perorsaasutut ilinniarsimasuuvoq aammalu Ilulissani perorsaanermut ilinniarfik 1995-imi aallartinneqarneranit 1998-imi siullersaalluni perorsaasunngornikuulluni.
Elisabeth Aasianneersuuvoq, aammalu Nalunnguarfiup Atuarfini suliffittaarami, 2005-imi ilaquttani ilagalugit Sisimiunut nuunnikuulluni. Tamannalu peqqissimissutiginngilaa.
- Ilinniartitsisutut ilinniarsimannginnera kisiat peqqissimissutigaara. Ilinniartitsisutummi inuuneq nuannareqaara. Soorlu assersuutigalugu ukiup atuarfiusup tulliani atuartut 4. klassinngorpata klassi taanna paarisinnaanngilara ilinniartitsisutut ilinniarsimasuunnginnama. Ukiuni pingasuni ilagisimagaanni, sooruna ilagiunnaarlugit tussunngunarpoq, Elisabeth oqarpoq.
Perorsaaneq
Elisabeth suliffini nuannarivaa, aamma aqutsisugissaarneq tassunga peqqutaaqataasoq oqarpoq. Pitsaasunik unammillernartunik akullugit, ilinniartitsisunik aqutsisunillu akimut suleqatigiilluarneq, ullut tamaasa suliartornissamut qilanaarnermik pilersitsinermut peqqutaalluinnarpoq.
- Naqissuserlugulu, taamaattumik suliffeqassagaanni, ingammik nukarlerni, meeqqanik suliaqarnissaq nuannarisariaqarpoq aammalu meeqqallu ullup qeqqarsiutissatut pissarsiarisimasaat ammartiteriarlugit meeqqanut agguaallugit. Illuatungaatigut perorsaasutut asannippasittumillu tulleriaarnissaanik qinnuigimmagit, eqqissisimapput Elisabeth-imullu ataqqinnillutik.
PIffissaq eqqorlugu piareersarsimallunilu suliartortuaannarnissaq Elisabeth-imut pingaaruteqarpoq. Minnerunngitsumillu tunniusimalluni. Tassami suliffini nuannarigaluarlugu, piffissap ilaani unammillerrnartoqartarpoq, taamatut suliffeqarnermi ullut marluk assigiinnissaat qularnartarmat.
- Ilinniartitsisuussaganni meeqqanillu assigiinngitsunik tunuliaqutalinnik sulissagaanni atitussuseqartoqartariaqassaaq, ullummi ilaanni sakkortusinnaasaramik. Aalajangiillaqqissuuneq tunniutiinnanngisaannarnissarlu iluaqutaasarpoq, Elisabeth oqarpoq.
Elisabeth atualerlaanut aqutsisutut pitsaasumik misilittagaqarlualereersimavoq. Ilinniartitsisutut ilinniarnissani eqqarsaatigisinnaagaluarpaa, tamannali eqqarsaataannaagallartariaqarpoq. Suliffini ilaqutariittullu inuunini naammagisimaarpaa, illalaarlunilu oqarpoq:
- maanga kisarunarpunga.