Jonna Mathiassen, 39-nik ukioqartoq, utoqqaat angerlarsimaffianni Qupanuk-mi tullersortaavoq. Sundhedshjælper-itut ilinniarsimasuuvoq, 2013-imili utoqqaat angerlarsimaffianniilersimalluni, ukiorlu taanna Uummannamit ilaquttani ilagalugit Sisimiunut nuulluni.
Jonna Uummannami utoqqaat angerlarsimaffianni ningiuusimavoq, taamaammallu aqutsisutut sulinermut ilisimasaqarluarluni. Tullersortitulli sulineq qanoq isumaqarpa?
- Aqutsisutut sulinermi suliassat assigiinngitsuupput. Ataasinngornikkut aqutsisut tamakkerlugit ataatsimeeqatigissarpavat. Sulisunut, ilinniartunut, igaffimmi ikiortinut, puigortunngorsimasunut eqitsisit pilersaarutillu suliarisarpagut. Aap, maani attuumassuteqartunut tamanut, Jonna-p oqaatigaa nangillunilu:
- Qaammammut pilersaarutit sanasarpagut, piffissami tassani suut naammasseriissanersut imaluunniit naammassineqarsimasut eqqartortarpagut. Taakku saniatigut ilinniartut suliffimmi misiliinerisa nalaanni ataqatigiissaarisarpunga, isumaqatigiissutaasumut eqitsisit naapertuunnersut misissortarpakka, maannakkullu aqutsisut akornanni attaveqaqatigiinnerup pitsanngortinnissaa qanoq unamminartiginersoq pillugu suliamik ingerlataqarlunga, tullersorti ulapeqisoq oqaluttuarpoq.
Unamminartut
Jonna ungasinngitsumi aamma inuummarissaasutut pikkorissarpoq, taamaalillunilu utoqqarnut sulisunullu sungiusartitsisarnissaminut peqqinnartunillu suliniuteqarnissaminut piffissamik nassaarniartussaassalluni.
- Ukioq kingulleq puigortunngortarneq pillugu aamma immikkut pikkorissarneqarpunga, puigortunngornerlu qanoq initutiginersoq pillugu paasititsiniutitut ataatsimiisitsisarlunga. Puigortunngorsimasup ilaqutaasa paasissutissiivigineqartalernissaat pilersaarutaasoq, oqaluttuaqqippoq.
2013-imi Qupanumi Jonna tullersortinngorpoq, 2015-imilu Nuummi aqutsisutut ilinniarneq ingerlassimallugu. Taanna sioqqullugu 2012-imi toqqammaviusumik aqutsisutut ilinniarneq naammassereernikuullugu.
- Sunut tamanut pilersaaruteqartuaannarpugut. Assersuutigalugu massakkut juullip tungaanut pilersaarusiorpugut. Ukiut tamaasa anguniakkagut nutarterneqartarput, suliffitsinnullu pitsaanerulernissarput sulissutigiuaannarlutigu.
Nassuerutigivaali suliffeqarfik immikkut ittumik pikkoriffeqarnerusariaqaraluartoq, tamannalu massakkut sulissutigalugu.
- Ajoraluartumik sulisugut taarserarput. Pingaartumik ilinniarsimanngitsut sulisoriinnarniarneri ajornartorsiutigaagut. Aaqqiissutissanik iliuuserisassanillu nassaarniarnermut piffissaq annertoorujussuaq atortarparput, utoqqarnummi aamma aalajaatsunik paaqqutarinnittoqarnissaq pitsaanerpaassaaq, oqarpoq.
Pitsaasumik suliffimmi avatangiiseqarnissaq pingaaruteqarpoq
Ilaannikkut kisimiittutut misiginartarsinnaavoq. Ingammik aaqqiagiinngittoqartillugu imaluunniit sulisut aqutsisullu akornanni imminnut paaseqatigiinnaveertoqartillugu.
Tamakku eqqaassanngikkaanni Qupanuk-miinnini nuannareqaa. Utoqqaat ajunnginnissaat iluamillu sulinissani pingaartitaraa, ullaakkullu suliartoraanni imminnut iluamik ilassisarnissaq (godmorgen-eernissaq) Jonna-mut pingaaruteqarpoq, taamaalilluni silaannarmik pitsaasumik pilersitsisoqarsinnaammat.
Aammattaaq Jonna-p suleqatini pitsaasut iluarivai illaqatigiissinnaasaramik, ullullu suliffiusartut nikerartuuneri aamma allanngorartitsisuullutik.
Naak inunnik paaqqutarinnittussatut ilinniarnikuugaluarluni massakkut allaffissornerup iluani sulisarnini naammagisimaartorujussuuaa.
- Taamatut sulissagaanni isumaqarpunga ataqqinninnermik takutitsisinnaaneq, paasinnissinnaaneq ilakkuminartuunissarlu pingaaruteqartorujussuusoq, taamaalillutik allat sukkulluunniit saaffiginnissinnaallutik misigisinnaassavaat. Sumiiffiga nuannarisorujussuuara. Suliffinni inuuninnilu, Jonna