Kuluk Jonathansen, 51-inik ukiulik meeqqerivimmi ataatsimi ukiut 25-t missaani sulisimavoq.
Ukiummi tulliani ukiut 25-inngortorsiorluni nalliuttorsiutigissavaa.
Kuluk ikiortaavoq ilinniarsimanngitsoq, Sarfannguanilu meeqqerivimmi Naasunnguami ulluinnarni suleqatini marluk peqatigalugit, meeqqat arfineq-marluk paarsarisarpai.
Meeqqat assigiinngitsunik sammisaqartissallugit nuannarisuuaa.
- Meeqqanik mikisunik sullitaqartilluni, misigissutsit assigiinngitsut aqqusaarneqartarput. Taamak sivisutigisumik immitsinnut najortaratta qanilaalinngitsoorfiunngillat, Kuluk oqarpoq. Ukiuni taamak amerlatigisuni sulisimatilluni, meeqqat paarsarinikuusimasat inersimasunngunngitsoorsinnaanngillat meeqqiunngitsoorsinnaanatillu.
- Ukiut ingerlanerini meeqqat paarsarisartakkakka nangilersortarsimasakkalu maannakkut inersimalereerput, maannakkullu meeraat nangilersortalersimallugit, illarluni oqarpoq.
Taamak qanitsigaluni suleqatigiitsilluni aammalu pingasuinnaatilluni, pitsaasumik suleqatigiinnissaq pingaaruteqartorujussuuvoq.
- Qujanartumik suleqatigiilluartuuvugut. Immitsinnut ammaffigisuuvugut, suliffimmalu qimakkusunnginneranut patsisaaqataasut ilagigunarpaat. Naak ukiut ingerlanerini pisortat taarseraassimagaluartut, ilaat pitsaasuusut ilaallu pitsaavallaanngikkaluartut, suliffiga nuannarisorujussuuara, Kuluk oqarpoq.
Naatsiaanik naatsitsinissamut unamminermi ajugaapput
Meeqqat suleqatillu marluk peqatigalugit suliaqarneq, Kuluk-mmut nuannernerpaasarpoq.
Assersuutigalugu ukioq kingulleq, Qeqqata Kommuniani naatitsinermut unamminermi, kikkut naatsiaanik amerlanerpaanik naatitsisinnaanermut unammeqatigiinnermi, kommunimi meeqqeriviit tamat peqataaffigisaannut peqataapput. Meeqqat naatsiianik 2600 kiluusunik naatitsinermi peqataatinneqarput, unamminermilu nr 3-nngorlutik 6000 koruuninik akissarsitinneqarput. Naatsiiat meeqqat nerisinneqartarnerinut atorneqartarput, piffissallu ingerlanerani naatsiianik katersisarneq ingerlasarsimalluni.
Naatitseqqinnissamut aningaasat atorneqassapput.
Oqaatigineqareersutut, ukiup tulliani Kuluk ukiuni 25-ni sulisimanermini nalliuttorsiutigineqassaaq.
Ukiut qulit matuma siorna ukiuni 15-inik sulinerminik nalliuttorsiorsimanini eqqaamalluarpaa.
Ilisimanngilluinnakkaminik, suleqatai ilaqutaasut ikinngutaasullu peqatigalugit ullaakkorsioqatigiinnissamik naasunillu tunniussinissaminnik, ulloq nalliuttorsiutiginiarlugu pilersaarusiorsimapput. Tamatuma saniatigut ullormi tassani sulinngiffeqarnissamik Kuluk akissarsitinneqarsimavoq.
- Ulloq nuannernera eqqaamanerarpaa, unamminartoqarsinnaaneralu aamma eqqaallugu.
- Eqqaamasat nuannersut qujanartumik amerlanerusimapput, meeqqalli arlaatigut sumiginnarneqartut, qujanartumik qaqutigoortuusut, pillugit qissatigisarpakka. Suliartorlunili qiimmallannartuaannarpoq. Assersuutigalugu angerlarsimaffimmi imaluunniit inuttut ajornartorsiuteqaraanni, suliffimmut apuulluni qiimmannartarpoq. Suna tamarmi qaamanerusutut isikkoqalersarpoq, Kuluk naggasiivoq.