Lisa Sørensen, 57-inik ukiulik suliffimmini ittannerusuuvoq. Ukioq mannami isumaginninnermi ikiortitut ukiuni 30-ni nalliuttorsiorpoq.
Maniitsumi meeqqerivik Paarsimi ulloq suleqatit, ikinngutit ilaquttallu peqatigalugit nalliuttorsiuutigineqarpoq, 2005-imili Paarsimi suleqataalersimavoq.
Immikkoortunut pingasunut meeqqat 44-t agguataarsimasuutigalugit suliassaaleqinanngilaq. ´Matumanilu eqqaamasat nuannersut ilaanngitsoorsinnaanngillat.
- Ilaana, meeqqani paarisartakkanni misigisat nuannersut arlaqarluinnarput, paarisartakkallu assammik kisitassaanngillat. Assersuutigalugu Kangerluarsummi asiariarnikuuvugut, meeqqallu ilaat ajoraluartumik atisanik taartissanik naammattunik nassarsimanngillat, tamannalu patsisaalluni meeqqat ilaat silami pinnguarneranni oqaluffitoqqami illuaqqatut atorneqartumi utaqqisariaqarsimapput. Soorunami kisimiissimanngilaq, namminerli atisai panersigassaasimapput. Angerlareerlutik meeqqat misigisimasaminnik titartaanissaannik oqaluttuarnissaanillu suliaqartinneqarsimapput. Niviarsiarannguaq atisanik taartissanik nassarsimanngitsoq illuaqqamik titartaasimavoq. Aperaarput sunaanersoq. Parnaarussiviunerarlugu akivoq. Tamanna quujatsaatigisorujussuuarput, Lisa illarluni oqarpoq.
Meeqqat inequnartut
Lisa meeraaqqani sulisuuvoq, meeqqallu ineriartornerinut malinnaanini nuannarisorujussuuaa. Annikitsuararpassuit tulluusimaarutissaapput.
- Qanilaarnermik pilersitsinngitsoornanngilaq, pingaartumik taamak mikitigitillugit, Lisa oqaluttuarpoq nangillunilu, nuannernerpaat ilagaat meeqqat allillutik angajullernut nuukkaangata, saneqquttoq takugaangamikku suaartartarput ’Liiiiisaaa’, arpaannarlu maleriarlugu eqitaartarlugu.
- Maannakkummi ukiut arlaqartut meeqqanik sullitaqarpunga, paarsarinikuusakkalu amerlaqisut maannakkut inersimasunngortitsernikuulerlutik. Illoqarfimmi naapillugit ornillunga ilassigaangata assut nuannertarpoq, Lisa ilassuteqarpoq.
Suleqatigiinneq
Lisa-p unamminartutut taasinnaasaata ilagaat angajoqqaanik suleqateqarniarnermik ajornartorsiuteqarneq.
- Taamatut pisoqartillugu ataasiakkaaraluni oqaloqatiginninnerit pitsaasuupput, Lisa oqarpoq nangillunilu, suleqatigiinnissaq pingaartupilussuuvoq, angajoqqaaniinnaanngitsoq aammali suleqatigiit akornanni.
- Assersuutigalugu perorsaasumik amigaateqarutta, taava nikeralaarnikkut imaluunniit allatigut pilersaarusiornikkut ajornartorsiutip qaangernissaanik suleqatigiittarneq pitsaasuuvoq. Isumaqarpunga tamanna pikkoriffigigipput, Lisa oqarpoq nangillunilu, ukiuni taamak amerlatigisuni sulereeraluarluni, suliffini qatsussimanngilaa.
-Suliffik nuannersuuvoq, tamannalu patsisaaqataalluni ukiuni taamak amerlatigisuni isumaginninnermik ikiortitut sulivunga. Tunniusimagaanni piumassuseqarlunilu, suna tamarmi pisariinnerusarpoq.