Louisannguaq Rosing suliassaaleqinngeqaaq. Kangaamiuni kommunip allaffiani ningiuullunilu, nunaqarfinnut arfiniliusunut ataqatigiissaarisuuvoq. Nunaqarfinnut ataqatigiissaarisuunermini, nunaqarfinnut angalallattaasarpoq.
- Nunaqarfitsinnut angalalluni, qanoq innersut tusarniaaffigalugit nuannertuaannarpoq. Taamaakkaluartoq Napasumi ilaqutaqanngikkaanni unnuiffiusinnaasut amerlanerunissaat kissaatigigaluarpara, Louisannguaq illarluni oqarpoq, Napasumut tikeraartilluni unnuiffissaqannginnami atuarfimmi natermi madrasiliinnarluni sinittariaqarsimalluni.
Taamaakkaluartoq suliffini nuannareqaa; suleqatigiit pingasuupput, saaffiginninnerniillu siunnersuinernut suliaqartarlutik.
Arnaq suliassaaleqinngitsoq
Louisannguaq Rosing allaffimmiutut ilinniagaqarpoq, ilinniarnini 1985-imi naammassillugu. Ukiuni 32-ni pisortani atorfeqarsimavoq, ukiunilu taakkunani Kangaamiuni atorfeqarsimalluni.
- Ukiut qulit matuma siorna aqutsisutut atorfinippunga, pisortatullu atorfeqarluni akisussaaffimmik annertuumik malitseqarpoq. Suliassat iluamik suliarinissaat pingaartippara, kukkusimatillungalu naqqinneqartarnera pingaartittarlugu. Isumaqarpunga naqqinneqarnerup tigunerlunneqartannginnissaa pingaaruteqartoq, naqqinneqarnermi siunissamut iluaqutaavoq, taama Louisannguaq Kangaamiuni inunngorlunilu peroriartortoq, ueqartoq, sisamanik qitornaqartoq erngutaqartorlu oqarpoq.
Louisannguup kommunimi aqutsisutut atorfeqarnermi saniatigut uinilu pisiniarfiuteqarput. Nunaqarfimmi innuttaasunut 310-usunut atisanik, nerisassanillu nioqquteqartarput.
Juulli qallivoq, nunaqarfimmilu orpiup ikinnissaani, Louisannguup piareersaaqataasarnini nuannareqaa, meeqqammi poortugannallutillu mamakujuttunut billetsissamik kommunimut aallertarmata.
Louisannguup Kangaamiuniinnini nuannareqaa, atorfeqarnikkullu inissisimalluarluni. Nunaqarfini qimassallugu takorloorsinnaanngilaa – aammalumi atorfini nuannareqisani qimassallugu takorloorsinnaanagu.
- Kisianni utoqqalillutik suliunnaangajalersut usorilaartalerlugit malugisinnaavara. Uangalu suli ukiorpaat qaangiuppata aatsaat utoqqalillunga suliunnaartussaallunga, Louisannguaq illarpoq.