50-inik ukiulik Marius Inusugtok, kommunip Sannaviani assigiinngitsunik suliaqartarpoq. Qimminik nakkutilliisuuvoq, asfalterinermi aqutsisuuvoq, iliveqarfimmik nakkutilliisuuvoq, massakkullu sannavimmi aqutsisuugallarluni.
Marius-ip ukiuni kingullerni tallimani suliffigisani nuannarisorujussuuaa.
- Ilinniagaqanngilanga, taamaattumik suliffiga suliffigisinnaagakku uannut pingaarutilerujussuuvoq. Inuttut ineriartornarpoq, qiimanissarlu pingaartittorujussuuara. Nalinginnaasumik suleqatigiilluartarpugut, suleqatilli akornanni assersuutigalugu aaqqiagiinngittoqartillugu oqaloqatigiissutigineqarnissaa, aaqqiagiinngissutaasimasullu iluarsiivigalugit qiimalluni soraarnissaq pingaartitaraara, Marius oqarpoq.
Akisussaaffiit assigiinngitsut
Sannavimmi sulisut 14-iusussaagaluarlutik, ullumikkut arfineq-pingasuupput. Taamaattumillu ulapaarlutik ulloqartarsinnaallutik.
- Oqartoqarsinnaavoq Sisimiut takujuminartuutinneqarnissaa pingaarnertut suliassarigipput. Eqqakkat angisuut aasarpagut, qimmit qitsuillu akiuussutissamik kapoortarpagut toqutassaappatalu toqullugit, aputaajaasarpugut, siorarterisarpugut, aqquserngit asfaltertarpagut, iliveqarfik isumagisarparput, aap, suna tamaat isumagaarput, Marius qungujulluni oqarpoq.
Suna tamaat isumaginera pineqartillugu.
Oqaloqatigiinniaasaartugut oqarasuaat sianerpoq, Mariusilu kisimi sannavimmiikkami oqarasuaat tiguaa, paasitinneqarlunilu Tuapannguani terianniamik takunnittoqarsimasoq.
Suleqatini illoqarfimmi suliaqartut kalerrisaarpai. Suleqataasa suliassaq isumagaat.
Sanngiitsunuunngitsoq
Mariusi suleqatinilu sulinertik ullaat tamaasa ataatsimiinnermik aallartittarpaat, tassanilu ullormut pilersaarutit suliassallu eqqartorneqartarput, suliassallu agguataarneqartarlutik.
Mariusi isumaqarpoq, ullaakkut inortuinani suliartortarnissaq pingaaruteqartoq. Nammineq napparsimakulanngilaq, tamannalu tulluusimaarutigalugu.
- Inortuillatuaraangama, immaqa ukiumut ataasiaannarlunga, kaagillertarpunga, Marius illarpoq.
Suliffik suliffigissagaanni tarnikkut nukittusariaqarsoraa, oqaatigalugulu ilaatigooriarluni qimminik qitsunnilluunniit toqutsisariaqartarlutik.
- Taanna pikkunarsinnaasarpoq, pisariaqarlunili. Uumasunimmi toqutsineq nuannersuunngilaq. Isumaga malillugu sullivik manna suliffigissagaanni aamma arlaatigut atornerluisuussanngilaq. Akisussaaffimmi ilisimaarineqartariaqarpoq, aammali sapaatip akunnerisa naanerini pigaartuusaratta. Taamaattumik sillimajuaannarpugut, Marius oqaluttuarpoq. Suliffimmi silaannaq nuannerpallaanngikkaangat, arlaatigulluunniit kukkuluttorsimatilluni inuttut tigunerlunneqartannginnissaa pingaaruteqartoq aamma isumaqarpoq. Suliffik, suliffiullu avataani inuuneq immikkoortinneqarsinnaasariaqarput, taamak oqarpoq.
Kukkuluttorneq
Kinaluunniit kukkuluttornikuuvoq. Aamma Mariusi.
- Taamaallunga illerfiit sisamat ilisussanngorpakka. Suliassara naammassivara, naammasseriillarlungali paasivarput ilerrit marluk paarlaattoorsimallugit. Tassa marluk paarlaassimagakkit ateriimmata. Suliarpullu naammassereerlugu. Kukkuninnut imminut isumakkeerfigineq ajulerpunga. Taamaassanngimmat matuersaatikka Sannavimmi nerrivimmut ilillaataa aqutsisorisara, taamanikkut feeriartoq, sianerfigaara pisimasumillu oqaluttuullugu, kukkuninnullu imminut isumakkeerfigisinnaananga. Nakkangavataarama, Marius illarpoq.
Sannavimmi aqutsisup pisoq Mariusimit eqqissisimanerusumik tiguaa.
- Saammarsarlunga oqarfigaanga soorunalimi tamatta kukkusartugut, iluarsissaqqaartorlu. Ilaqutaasut sianerfigaagut kukkunerpullu nassuiaallugu, siulliup akueriinnarpaa iliverlu tassaniitiinnarparput, aappaa allamut inissipparput. Suliarlu taanna naammassilluni. Kingusinnerusukkut ittorisara aatsaat nassuiaappara kukkunera ajoringaarakku imminut soraarsereersimagaluarlunga, Marius naggasiivoq.