Najaaraq Egede, 31-nik ukiulik 2014-imi isumaginninnermi ikiortitut ilinniarnerminik naammassinnippoq, ukiullu tullissaani Kangaamiuni meeqqerivik Naja-mi, 16-inik meerartalimmi atorfinitsinneqarluni.
Najaaraq Kangaamiormiuviuvoq suliffimminik nuannarisaqartoq, meeqqanimmi sullitaqarnissaminik, pingaartumik atualilertussanik, nuannarinnittupilussuulluni.
- Qujanartumik meeqqanik atualilertussanik sullitaqarpunga. Meeqqat ilinniartissallugit nuannarisupilorujussuuaa, taamatut ukioqalernermi ilinniarfiusarmat. Meeqqat ilikkakkaminni ima inissisimaleraangata, atualernissaminnut piareersimalluinnarlutik nuannernerpaavoq. Tulluusimaartaqaat uagutsinniillu isigissallugit nuannerluinnarluni, Najaaraq oqaluttuarpoq.
Najaaqqap ilinniarnera Maniitsumi ingerlanneqarpoq, sunngiffimmilu ornittakkami sulinermik misiliisimalluni, naak nuannarisimagaluarlugu nunaqarfimmut uternini, meeqqerivimmilu sulilersimanini nuannarilluinnarpaa.
- Maani ullormut suliffissatsinnut pilersaarusiornitsinnullu aallaavigisassatsinnik amerlanerusunik malittarisassaqarpugut. Tamakkuupput uannik toqqissisimanarnerusut, oqarpoq.
Unammillernartut tatitussuserlu
Aalajangersimasumik malittarisassat saniatigut, suliartornissaminut qilanaarutigisartagai ilaqarput.
- Suliffitta avatangiisia pitsaasuuvoq. Pitsaasunik suleqateqarnissaq pingaaruteqarpoq, Najaaraq erseqqissaavoq.
Meeqqanik mikisunik sullitaqartilluni aamma unammillernartoqarpoq. Assersuutigalugu ukiup tullissaanut anguniakkanik pilersaarutinillu angusaqarnissamut ilungersorluni sulisoqarpoq.
Najaaraq isumaqarpoq, isumaginninnermi ikiortitut ilinniagaqarnermi, piffissat ilaanni ilungersorluni sulisarnissaq piareersimaffigineqartariaqartoq.
Tamatumalu saniatigut tatitussuseqarnissaq kiisalu ilinniagaqarnermi tiimini malinnaalluarnissaq pingaaruteqarpoq.
- Ilinniartilluni, pingaartumik meeqqanik sullitaqarluni, inuttut annertuumik ineriartorfiusarpoq. Sunami tamarmi pisariitsuunngilaq, ilinniartutullu artorsarfiusinnaasuni tunniutiinnannginnissaq pingaaruteqartoq, oqarpoq.
Najaaqqap ilinniaqqinnissani takorloorpaa, socialassistentitut imaluunniit perorsaasutut. Siunissamili qaninnermi tamani pinissaa ilimananngilaq.
- Piffissanngortoq misigisimaleruma iliuuseqarumaarpunga. Maannakkut suliffiga inuuneralu ilorrisimaarutigigallarpakka, oqarpoq.