Inuutissarsiuutigalugu piniarnermut/tammajuitsussarsisitsiniarnermut atatillugu piffissami killilikkami angallassisinnaanermut akuersissutinik inuit atugaqartut, angalanerminni piniarnermut allagartatik tamatigut nassartassavaat. Taanna piniarfissap piffissaani aammalu inuutissarsiuutigalugu piniartutut / tammajuitsussarsisitsiniarnermut atuunnermut immikkoortuni aqqutissatullu toqqakkani angallannermut akuersissutitut uppernarsaatitut atorneqassaaq. Nunap assingini ilanngussani 1-imiit 5-imut immikkoortut takuneqarsinnaapput.
Annertunerusumik paasisaqarusukkuit, nunap assinginut nassiussuunneqartunut ileqqoreqqusamut siunnersuut ilanngunneqartoq atuaruk.
Ukiut siuliinut sanilliullugu ukiuunerani angallassinnaanermut ammaaffigineqartut makkuupput:
- Sisimiut eqqaanni angallaffiusinnaasoq, kangerluarsuk tullermut, kangerluarsuk ungallermut aammalu Tasersuup akornanni nunatami annertujaartumik ilaneqarpoq. Taamaaliornikkut Aqqutikitsoq kaajallallugu angalasoqarsinnaanngorpoq.
- Kangerlussuarmi nunaqarfimmiit avannamut immikoortumi qanorsuaq angalasinnaaneq, umiarsualiviup tungaanut aqqusinikkut taavalu kangerluk sinerlugu avannamut kilometerialunnguit.
- Sisimiut eqqaanni angallaviusinnaasutut pilersitani pingasuuni ukioq kaajallallugu angalasoqarsinnaanngorpoq, ukunani: Erngup nukinga atorlugu nukissiorfimmiit aqqusinikkut sioraasukkut Tasersuup kangiatungaanut, Itivneq-miit aqqusinikkut sioraasukkut sapusiap avannaanut, Itillip kangerluaniit qaqqatoqqamut aqqusnikkut sioraasukkut.