Sisimiut Katersugaasiviat ukiup qaammataani aggersuni siunnerpoq ilisimasat nalilerneqarsinnaanngitsut taarserneqarsinnaanngitsullu illoqarfimmi innuttaasut pigisaat quujanartut, nuannersut nuanniitsulluunniit katersorniarlugit.
Katersugaasiviup sulisui neriupput sapinngisamik innuttaasut amerlasuut aggialluartarumaartut oqaluttuarsiffigilluartarumaarlugillu qulequttat sammineqartussat. Eqqaamasalikkersaarnissinni neriuppugut pisimasut ataatsimoorlusi misiginikuusasi imaluunniit nassuiaateqarfigisinnaasasi saqqummersittarumaarisi.
Oqaluttuat båndimut immiunneqartassapput piorsarsimassutsikkut nalillit eqqaassutissat kingunissamut toqqorneqarniassammata.
Eqqaamasalikkersaarnermut ilaaneq akeqanngilaq, ingerlanneqassaarlu ajoqersuiartortitsisup Glahnip illuata B-113-imiittup ataatsimiittarfiani, nalunaaqutaq 14:00-mit 16:00-mut. Eqqaamasalikkersaartitsinermi panernaveequtigalugu kaffeqassaaq.
Ataasinngorneq, novembarip 9-at 2009
Kalaallit Nunaata amutsiviisa siullersaanni sulisuuneq
Ataasinngorneq, novembarip 23-iat 2009
Fabrikki taassumalu oqaluttuassartaa – qaleralinnit raajanut
Ataasinngorneq, decemberip 7-iat 2009
Arnat suliaat, arnallu inuiaqatigiinnut sunniuteqarnerat
Ataasinngorneq, januaarip 11-iat 2010
Aavartarneq nunallu timaani ukiakkut sammisassat
Ataasinngorneq, januaarip 25-iat 2010
Allannguutit misigisallu nunaqarfiit matoorarnerisigut
Ataasinngorneq, februaarip 8-aat 2010
Sisimiut illoqarfittut ineriartornera pilersaarusiorneqarneralu
Neriuppugut oqaluttuarusuttunik amerlasuunik katersugaasivimmi takussalluta, qilanaarpugullu qanga pissutsinik, ullumikkornisanik siunissarlu pillugu oqaluttuassassinnut.
Anne Bahnson
Sisimiut Katersugaasiviata ingerlatsisua