Tamanna annerusumik Nuummi akunnittarfinnut takornarialerisunullu annertuumik aningaasarsiornikkut iluaqutaasoq malinnaavigivarput. Paasisinnavakkalu aningaasarsiorluarnerminnik iluarisimaarinnittut, soorunami. Taamaakkaluartoq isumaqarpunga angalasut amerliartornerat nunatsinni innuttaasunut amerlanerpaanut iluaqutaanani ajoqutaasutut oqaatigigaanni tulluarnerusoq, aamma ilaatigut Nuummi najugaqartunut. Tassami angalarusussueq annertusiartortillugu bilitsit akii akitsoriartortartut Air Greenlandip nammineq uppernarsarpaa.
Eqqaamassavarput nunatsinni nunani allanisuulli imaasiallaannarluta angalanissatsinnut periarfissaqanngilagut, angalanerlu taamak akisutigitillugu nunatsinni innuttaasut nammineq akilikkaminnik kikkut akissaqarpat? Assersuutigalugu angallaffiulluarnerpaap nalaani Sisimiuniit Nuummut utimullu ilaatigut 7.000kr. angullugit akeqartarput, ingasannerpaagaangat allaat siumuinnaq 7.000kr. angullugit akilllit taamaallaat periarfissaalertarlutik. Malugalugu minutsini 60-ni siumuinnaq timmisartorneq. Soorunaana tupinnanngitsumik arlaleriarluta tusartarpagut ilaquttaminnut tikeraarusukkaluarlutik bilitsit akisuallaarujussuarneri pissutigalugit taamaatitsiinnartut. Kikkummi inummut ataatsimut nalunaaquttap akunnerani ataatsimi timmisartornermut 7.000kr.-mut akissaqaramik?
Timmisartuussisarnerit aalajangersimasut aqqutigalugit nunatta avataanut 2025-mi 2024-mut sanilliullugit angalasut 18,2%-imik qaffariarsimanerisigut Naalakkersuisuniit oqaatiginiarneqarpoq, bilitsit akii qaffasikkaluaqisut innuttaasut suli angalarusussuseqarluartut. Kisianni qaffariaateqartitsisut ilumut nunatsinni najugaqartuuppat? Naamik. Air Greenlandip ilisimatitsissutaani atuarneqarsinnaavoq piffissami pineqartumi Air Greenlandimut ilaallutik angalasimasuni nunatsinni najugallit taamaallaat 2%-imik amerlisimasut, nunanit allaneersut 9%-imik, Danmarkimilu najugallit amerleriarnerpaallutik 25%-imik amerlisimasut. Qularnanngitsumik tamatumunnga annertunerpaamik Trump pissutaalluni. Taamaattumik qaffariaateqartitsisut taakkuunngillat innuttaasut nunatsinni najugaqartut. Taakkuami akissaqanngillat.
Orsussap akiata ineriartornera aammalu mittarfinnut akitsuutit allanngorsimaneri bilitsit akitsorujussuarsimanerinut Air Greenlandimiit ilaatigut tunngavilersuutigineqartartut, maluginiarpara Naalakkersuisuniit aammalu Greenland Airportimiit akerlilerneqarnerat. Greenland Airportimiimmi oqariartuutigineqarpoq mittarfinnut akitsuutit 2021-miit 2026-mut agguaqatigiissillugu taamaallaat 2%-mik qaffattarsimasut. Suluusalinnut mittarfinnut 2021-mi 282kr.-imiit 2026-mi 316kr.-mut qaffassimapput, qaffariaat katillugu 34kr. Aammalu orsussaq ukiut siuliini 3-ni nikinngereerluni 2024-miit 2026-mut liiterimut akia 1kr.-imik qaffassimasoq, taamaattumillu mittarfinnut akitsuutit orsussamullu aningaasartuutit bilitstit akiisa ilaminiinnannguarigai Greenland Airportimiit nalilerneqarput. Taamaattumillu bilitsit akitsorujussuarnerinut orsussaq akitsuutillu pingaarnertut peqqutaanngitsut Naalakkersuisuniit, Greenland Airportimiitimiillu nalilerneqarput.
Soorunami Air Greenland aamma allatuulli aningaasarsiortariaqarnera isumaqatigaara aammalu silamik akornusersorneqartarnera ilisimallugu. Eqqaamaneqassaarli Air Greenland inuiaqatigiinnit pigineqarpoq. Naatsorsuutigaaralu innuttaasut angalasinnaanissaat siunertaralugu pilersinneqarsimassasoq. Taamaattumik innuttaasut inorserujussuarluta akeqartitsinera isumaqarpunga innuttaasunut annertuumik mitalliinerusoq akuerineqarsinnaanngitsorlu. Taamaattumik innuttaasut angalanissaminnut periarfissaarutsinneqarnerat Naalakkersuisut inuiaqatigiit sinnerlugit piginnittutut erseqqissumik tamanna akuerinagu oqariartuutigisariaqaraluarpaat, akuleruteqqusaannginneq utoqqatsissutigalugu nipangiusimaannarnagu. Nipangersimaannarnermi atugassarititaasunut akuersaaginnarnertut inuiaqatigiinnilu atugassarititaasunut aktieselskabet suneqarsinnaanngitsutut akisussaasunngortinneqarsimanerannik paasisassaavoq.
Angalaneq kiffaanngissutsimut tunngassuteqarpoq. Air Greenlandillu inuiaat kalaallit allatuulli ilaquttaminnut tikeraarsinnaanissaat, nunattalu avataanut misigisassarsiorsinnaanissaat inuiaqatigiinnut kalaallinut neqeroorutigisinnaanngippagu, taava tamatta isumaqatigiissutiginiartigu angalanaveersaalerniarluta, takornarissat ilanngullutik.
Sumummi iluaqutaava angalasut amerliartornerat tulluusimaarutigalugu pappilissami kusanartumik saqqummiunneranniit innuttaasut angalasinnaajunnaarsinneqarsimallutik misigisimappata?
Annertunerusumik paasisaqarusukkuit attavigiuk
Malik Berthelsen
Borgmesteri/ borgmester
Qeqqata Kommunia
Telefon: (+299) 86 73 00