Tallimanngornermi novembarip 13-ni Sisimiuni Sisorartarfeqarfik namminersortunut nakkutigisassanngortinneqarpoq. Illoqarfimmi suliffeqarfiup Igloo Mountain-ip tigummagu.
Saamerlermiit: Direktøri Igloo Mountain-mi, Larseeraq Skifte, Borgmesteri Hermann Berthelsen aamma ingerlatsinermi pisortaq Niels Bentsen
Tamanna Qeqqata kommunalbestyrelsiata kissaateqarneranit tunuliaqutaqarpoq, tassa kommunimi kiffartuussinerit namminersortunngorsarnissaannik pingaartitsinermik.
Massakkumut Sisimiut Kangerlussuullu akornanni takornarissanut illuaqqat suliariumannittussarsiuussinikkut nakkutigisarititaapput, massakkut tassa sisorartarfeqarfik aamma namminersortunit nakkutigineqalerluni. Qaammat kingulleq Kangerlussuarmi bowlinngertarfik aamma namminersortumit nakkutigineqalernikuulluni.
Suliariumannittussarsiuussinikkut namminersortunngorsaanikkut suliffissanik nutaanik pilersitsisarpoq imaluunniit pioreersunik ineriartortinermik kinguneqartarluni, illoqarfimmi inuutissarsiutitigut ineriartortitsinermi iluaqutaasumik. Pisut ilaatigut kommunimut akikinnerusinnaasarpoq, soorlu bowlinngertarfiup namminersortumik nakkutigineqalernera taama kinguneqartoq.
Sisorartarfiup namminersortunit nakkutigineqalernera kommunip aningaasartuutaasigut sunniuteqarpoq, tamatumanili aamma Igloo Mountain-ip takornarissanik kiffartuussinerani tunngaviliisuussalluni allatigullu inuutissarsiutitigut pilersaarutaasigut aamma sunniuteqartussaassalluni.
Borgmesterip Hermann Berthelsen-ip naatsorsuutigivaa, Qeqqata Kommuniani kiffartuussinerit suli allat piffissami aggersumi namminersortunngorsarneqassasut suliariumannittussaarsiuuneqassallutillu, kisiannili erseqqissarlugu soorunalimi akitigut isumannaatsumik.