Nuummi, Maniitsumi, Sisimiuni Kangerlussuarmilu innuttaasunut ataatsimiisitsinissat aalajangiunneqarput kinguartinneqassasut. Innuttaasunut ataatsimiisitsinissat ingerlanneqarnissaanut siunertarineqarpoq 2009-mi suliniummut atatillugu misissuisimanerit ingerlanneqarsimasut pillugit innuttaasunut ilisimatitsinissat aammalu attaveqatigiinnerit annertusarneqarnissaat. Misissuinerit ilaatigut ilagivaat sanaartugassanut atatillugu teknikkikkut misissuinerit, suliniutip avatangiisinut sunniutigisinnaasai (ASN), piorsarsimassutsikkut eriagisarialinnut tunngasut, inuiaqatigiinnut sunniutaasinnaasut il.il..
Kinguartitsinermut tunngaviuvoq, soqutiginnittuusinnaasut pingaarutillit akornanni ilaatigut ulapaartoqarnerat pissutaalluni innuttaasunut ataatsimiisitsinerni qulakkeerneqarsinnaasimanngilaq kissaatigisatut oqartussanit pingaarutilinnit peqataasoqartoqarsinnaanera.
Ataatsimiisitsinerit ingerlanneqassapput januaari 2010-mi. Taamanikkussamut naatsorsuutigineqarpoq maannakkut misissuinerit suli ingerlanneqartut naammasseqqammisulluunniit naammassereersimallutik avammut saqqummiunneqareersimanissaat. Taamaasilluni misissuinerniit suli itisiliinerusumik paasissutissiisoqarsinnaanissaa periarfissaalissaaq. Misissueqqissaarnerit ilaatigut ilagivaat: inuiaqatigiinnut aningaasarsiornikkut sunniutaasinnaasut aammalu nuttarnerit misissueqqissaarfigineqarneri, Tasersiap aamma Tarsartuup Tasersuata piorsarsimassutsikkut oqaluttuarisaanikkut sutigut pingaaruteqarneri pillugit nalunaarusiaq inaarutaasoq, aammalu tunngaviusumik uumassusillit naasartullu suli sunnerneqannginnerini misissuiffigineqarneri.
Ataatsimiisitsinissanik novembarimiit januaarimut kinguartitsineq naatsorsuutigineqanngilaq avatangiisinut sunniutaasinnaasut naliliiffigineqarnissaanut (ASN) suliat ingerlanneqartut pilersaarusiorneranut sunniuteqarnissaa aammalu allanut suliniutip aningaasarsiornikkut, isumaginninnikkut avatangiisitigullu piujuaannartinneqarnissaanut. Misissueqqissaarnerni nalunaarusiat naammassineri najoqqutaralugit www.aluminium.gl –imi saqqummersinneqartassapput.