Sisimiuni innuttaasunut sisamanut nersornaasiineq Taseralimmi ingerlanneqarpoq.
Nersornaasiinneqartut: Ane Marie Olsen, Arnajaraq Kleist, jan Storch aamma Zeth Fly.
Sisimiuni inuit kommunimut malunnaatilimmik iliuuseqarnikunut nersornaasiisarneq 1984-imiilli aallartinneqarpoq. Kommunalbetyrelsip ataatsimiittarfianili pisaraluartoq aatsaat siullermeerluni allami ingerlanneqarluni. Ilaqutaasut, ikinngutit ilisarisimasallu amerlasuut najuuttarmata, ukioq manna Taseralimmiinnissaa aalajangiunneqarluni. Ukioq mannalu nersornaasigassat sisamaammata Kommunalbetyrelsip ataatsimiittarfiani inissaqarnavianngitsoq nalilerneqarnikuuvoq.
Arnajaraq Kleist, Ane Marie Olsen, Jan Storch aamma Zeth Fly naasunik, diplomimik checkimillu 5000 koruuninik aningaasartalimmik Qeqqata Kommunianit tunineqarnermikkut nersorniarneqarput. Katerisimaarneq aallartillugu erinarsoqatigiit Sikkersoq erinnamik atuipput, tamatumalu kingorna tikilluaqqusineq, nersornaaserneqartussanik ilisarititsineq nersornaasiussassanillu agguaassineq borgmester Hermann Berthelsen-imit ingerlanneqarluni, kingornatigullu Sikkerskkut erinnamik atueqqipput. Erinnamik atuereermata oqaaseqarumasut oqaaseqarput, naggataatigullu tamulugassaqarlunilu iggisissaqartitsisoqarpoq.