Maniitsumi kommunip allaffissuani annertuutigut iluarsartuussisoqarpoq. Qalipaatit nutaat allaffeqarfiillu ”nutaat” kommunip allaffissua iseruminartunngortissavaat, soorunalimi innuttaasunut sulisunullu
Kommunip suliffeqarfii allaffissuarmut katersuunneqassapput. Tamanna iluarsaartuussinerup siunertarivaa, tassa allaffissuarmi ukioq kingullerli aggustimi allartittumik nutsernertigut periarfissaqalermat.
Suliffeqarfiit ukioq kingulleq ilanngullugu siammasillutik inissisimasimapput. Assersuutigalugu illoqarfiup atuakkanik atorniartarfiutaa katersugaasivimmiissimavoq, massakkulli kommunip allaffissuanut nuunneqarluni. Illuutinik nakkutilliisoq Ejvind Richard innuttaasunik kiffartuussiveqarfiit ataatsimoortillugit katersuutsinnissaat pingaarutissimallugu oqaaseqarpoq.
Tamannali suli tamakkiisumik anguneqanngilaq. Assersuutigalugu meeqqeriviit allaffeqarfiat suli atuarfimmiippoq.
- Allaffissuulli sullitanut atoruminartunngortinnissaa anguniartuarpara, illuutinik nakkutillisoq iluarsartuussinermilu akisussaasuusoq Ejvind Richard oqarpoq.
Aamma imaaliortoqartussaavoq, saaffiginnittut utaqqisarfianni isiginnaarummik anginngitsunnguamik ikkussisoqassaaq. Titartakkat meeqqanik isiginnaarneqarsinnaassallutik.
Aamma normunik tigooraaviliisoqassalluni, taamaalilluni allaffissuarmi nipiliorneq annikillisinneqassalluni. Ullumikkummi imaattoqartarpoq, innuttaasoq normumik tigusisimasoq tullinnguuttorlu normua gangikkut suaarutigineqartarluni: NR. 10!
Saaffiginnittarfiup qulaani aamma isiginnaarutinnguamik ikkusisoqassaaq. Tassanilu paasissutissat takuneqarsinnaassallutik, soorlu ammasarfiit.
Sulisut peqataatinneqassapput
Maniitsumi kommunip allaffissua sisamanik quleriiuvoq. Tassalu majuartarfippaalussuullutik. Tamanna Ejvind Richard-ip iliuuseqarfiginiarlugu aalajangiisimavoq. Kommunip allaffissuani sulisunik unammisitsisimalluni. Gangini kusassaatissanik qalipakkanik siunnersuusiortussaalluutik, taamaalilluni qummut majuarneq soqutiginarnerulertillugu.
- Soorlu sulisut ilaata sullitaq qummut majuaqatigiguniuk, taava sulisoq oqarsinnaavoq: ”Una tassa uanga suliara”, taamaalillunilu sulisumut saaffiginnittumullu inuppalaarnerusumik pissuseqartoqalerluni, Ejvind Richard oqaluttuarpoq.
Ejvind Richard-ip assiliaa
Siunnersuutit 14-t tigusimavai. Taakkunanngalu arfineq-marluk qalipanneqarsimallutik.
Tamakku saniatigut kommunip allaffissuani allaffeqarfeqarfiit talutaqanngitsunik iseruminarsarneqarput. Siornatigut allaffiit talutaqanngitsut ammaannartuusimapput. Ullumikkulli ammaannarunnaarnerullutik qalipaateqarnerulerlutillu.
Kommunip allaffissuani allanngortiterinermi sulisut peqataatinnissaat pingaaruteqartutut Ejvind Richard-ip isumaqarfigivaa.
- Suliartorneq nuarnersuusariaqarpoq, taama oqarpoq Ejvind Richard.
