Inuiaqatigiit pitsaasut anguneqarnissaanut Maniitsormiut peqataarusussueqarluarlutillu piumassuseqarluarput
Nammanneqarsinnaasumik ineriartortitsinissap siuarsarneqarnissaa anguniarlugu, sapaatit akunneri kingulliit Maniitsumi innuttaasut Qeqqata Kommunialu peqatigiillutik periuusissat pillugit oqallipput.
Sapaatip akunnerata ingerlanerani illussanik titartaasartut 70°N-imeersut tikeraarput. Sapaatip akunnera sioqqullugu innuttaasut suleqatigiit siunissami suliniutissatik pillugit suleqatigiisitsipput/oqallitsitsipput. – pilersaarutillu arlallit maanna suliarineqaleruttorput!
Aluminiumik aatsitsiviliornissami pilersaaruteqarnermut atatillugu misissueqqaarnerit ingerlanerani kiisalu aluminiumik aatsitsisviliornissamik pilersaarut piviusunngussanersoq pillugu Namminersorlutik Oqartussat Alcoallu aalajangiinissaat utaqqinerani, Maniitsormiut Qeqqata Kommunialu uninngaannarusunngillat.
Taamaattumik Maniitsumi inuutissarsiutinut kommunimullu tunngasutigut innuttaasut peqataalluarput. Maniitsormiut illoqarfigisami ineriartornissaanut nammineq ingerlatsisuunissartik angorusuppaat – aammattaaq Maniitsup siunissami najugaqarfigiuminartuullunilu suliffikkuminartuunissaanut.
- Illussanik titartaasartut 70°N-imeersut tikeraarnerat.
Sapaatip akunnera (marsip 1-ianiit 7-ianut) Maniitsumi pissanganartunik misigisaqarfiuvoq, illussanik titartaasartut marluk nunarsuaq tamakkerlugu akuerisaasumit Norgep avannaaniittumi Tromsømeersumit 70°N-imeersut, peqatigalugit innuttaasunik ataatsimiisitsoqarlunilu illoqarfiup iluani angalaaqatigiittoqarpoq. Illoqarfiup imminut napatissinnaaneranut ineriartuutaasinnaasunut tunngavilersuutaasinnaasunik isumassarsianik, ilusilersueriaaseq pillugu takorluukkanik ilisimasanillu, attaveqaqatiinneq kiisalu illoqarfimmi avangiiseq pillugu avitseqatigiinnissamik siunertaqartumik innuttaasut qanimut oqaloqatigineqarnissaat 70°N-imit kissaatigineqarpoq. Borgmester Hermann Berthelsenimit peqataaffigineqartumi innuttaasut ataatsimiisinneqarnerani, innuttaasut suleqatigiit suliaminni angusatik pillugit saqqummiipput, aamma 70°N-imeersut illoqarfik pillugu isumassarsiaminnik takorluukkaminnillu takutitsipput. Tamatuma kingornatigut 70°N-ip suleriaqqinnissaanut iluaqutaasinnaasunik illoqarfiup ineriartornissaanut sammiviit assigiinngitsut eqimattakkaanit oqallisigineqarlutik. Illoqarfiup iluani angalaaqatigiinnermi Maniitsup oqaluttuassartaa Maniitsumilu piffissap ingerlanerani illuliaasartut kiisalu nutaanik illuliortiternissami periarfissat illoqarfiullu ilusilerneqarnissaa pillugit aamma eqqartuisoqarpoq. Maniitsup siunissaa pillugu ilusiliinissami oqaluuserisassaaleqinngillat. - Periusissaq pillugu innuttaasunik suleqatigiisitsineq/oqallitsitsineq.
Februaarip 20-ni 21-nilu sapaatip akuunerata naanerani suleqatigiisitsinermi/oqallitsitsinermi peqataasut nukissaqarluarlutillu piumassuseqarluarput. Innuttaasut suleqatigiit siunissami suliassaannut iliuusissanik suliniaqqinnissaq pilersaarutaasunillu pilersusiornissaq siunertarineqarput, ilaatigut Qeqqata Kommunia suleqatigineqassalluni. Qeqqata Kommuniata Greenland Development suleqatigalugu suleqatigiisitsineq/oqallitsitsineq Kompetencekompagniemi siunnersortaasumit Hans Peter Poulsen-imit aqunneqartoq tapersersorpaa. Suut qitiutinneqassanersut qanorlu ingerlanneqassanersut ilaatigut oqallisigineqarput. Aalajangerneqartut ilagaat, pilersaarutini pingaarnerutitassanik naammassisaasussanik innuttaasut suleqatigiinnit kommunimiillu sinniisoqartussanik aqutsisoqatigiiliortoqassasoq. Iluaqutissanik qanorlu iliortoqarnissaanik ilisimasanik tunniussaqarsinnaasunik allanik ingerlatsisunik ilaatigut Greenland Development-imit sinniisoqartinneqassasoq tassunga peqatigitillugu kissaatigineqarpoq. Suliniut ingerlatiinnarneqarlunilu pilersaarutit piviusunngortinneqassapput.