Maniitsumi innuttaasunit suleqatigiissitat sisamaanikuullutik, kommunip aamma Namminersorlutik Oqartussat kissaataasa naammassineqarnissaannut nukittunerujumallutik maanna ataatsimoorput
Aallaqqaammut innuttaasut suleqatigiissitaasa sisamaallutik ilaqutariinnermut sunngiffimmullu, kulturimut takornariaqarnermullu, ilinniartitaanermut suliffissaqartitsiniarnermullu kiisalu attaveqatigiinnermut ineqarnermullu suleqatigiissitat pilersinneqarnikuupput.
Suleqaatigiissitat taakku nalunaarummi ”Maniitsup siunissami ineriartortinneqarnissaa”-nut pilersaarutinut aalajangersimasunut aamma siunnersuutitaqartumut takorluukkatik pillugit sinniisuutitaqarput. Suleqatigiissitat taakku sisamat februaarimi Kompetancekompagniet-imit Hans Peter Poulsen-ip paasisitsiniaanerani peqataapput.
Matumani suleqatigiissitat ataatsimuulernermikkut nukittunerulernissaat siunnersortip oqaatigaa. Tamanna isumaqatigineqarluni tigulluarneqarpoq.
Sinniisussat sisamat, taakkulu sinniisussaat toqqarneqarput. Sinniisussatut toqqakkat ilaat Teera Grønvold sulinermi nalaani ataatsimiigiaraangami aningaasarsiassaminit ilanngaatsittarami, annikikkaluamik aningaasarsissutigisussanngorlugu suliassaq inuiaqatigiinnut sullissinertut taaneqarsinnaannginnersoq alumiiniliorfissaq pillugu pilersaarummut kommunip ataqatigiissaarisuanut Birte Engelsen-imut aperivoq. Karl Lyberth-ip tamanna misissorumallugu Teera Grønvold aamma Birte Engelsen neriorsorpai.
Nerriviup isuta saamerliani Karl Lybert issiavoq, asserlu salliani Teera Grønvold issialluni
Maniitsoq ukiunik 75-inik utoqqaatigisutut isikkulik
Februaarimi paasisitsiniaanermi eqqaaneqarpoq, Maniitsoq inummut 75-inik ukiulimmut assersuunneqarsinnaasoq. Imaappoq, Maniitsoq toqujartuinnartoq, arlaatigullu iliuuseqartoqanngippat matuinnartariaqassasoq.
Oqaluffitoqqami innuttaasut suleqatigiissitaata ataatsimiinneranni tamanna eqqartorneqangaatsiarpoq. Maniitsoq najugaqarfissatut kajuminartunngortinneqarluni uummaarissarneqarnissasoq tamanit isumaqatigineqarpoq. Tamannalu suleqatigiissitap maannakkut suliniutigaa.
Politikkikkut tapersersorneqarneq
Karl Lyberth Qeqqata Kommuniani Kommunalbestyrelsi sinnerlugu ataatsimiinnermi peqataasoq oqarpoq, innuttaasut suleqatigiissitaasa suliniutaat, pilersaarutaat minnerunngitsumillu suliaannut tunngasut politikkikkut tapersersorluarneqarmata, suleqatigiissitap sulinera asuliinnaanavianngitsoq.
Greenland Development-miit Ellen Christoffersen, ataatsimiititsisoq Jaakutoqaq aamma kommunemiit alumiiniumik aatsiteriffissaq pillugu ataqatigiissaarisoq Birte Engelsen