Maniitsup Katersugaasivia ”Angujaartorfik – qangaanerusoq maannakkullu aavartarneq” pillugu ilisimatusarluni suliniutaanut Kalaallit Nunaanni Kommunit Aningaasaateqarfiat tapiissuteqarpoq
Ilisimatusarluni suliniummut taaguutilimmut ”Angujaartorfik – qangaanerusoq maannakkullu aavartarnermut ” Maniitsup Katersugaasiviata tapiiffigineqarnissamik qinnuteqaataa, Nunatsinni Itsarnitsanik Misissuinernut Kalaallit Nunaanni Kommunit Aningaasaateqarfiata siulersuisuinit akuersissutigineqarpoq. Tamatuma kingunerisaanik piffissap ingerlanerani aavartarneq pillugu katersugaasivik ilisimatusarnissaminut 50.000 koruuninik pissarsissaaq.
Ilisimatusarluni suliniut pillugu
Aasaq manna suleqatigiit nunanit tamalaaneersut kalaallit, tyskit qallunaallu suliffeqarfiutaannit inuttaqartup Angujaartorfiup nunataani aavartarnermik ileqquusimasup misissuiffigineqarluni suliarineqarnera nanginneqassaaq. Suliniutip siunertarivaa, inoqarfiit aammalu piniarnerit qanoq aaqqissuussaasarnerinut siusinnerusukkut maannakkullu periusaasartut paasisaqarfigineqarnissaat. Angujaartorfik aasisarfitoqaavoq, Qeqqata Kommuniani Maniitsup nunataata eqqaani Angujaartorfiup Nunaa-ni nunap timaanut aqqutit ilaasa ilaanni inissisimasoq.
Angujaartorfik, foto: Maniitsoq Museum
Ilisimatusarluni suliniut ukioq kingulleq suliniutigineqalerpoq, taamtumani aasarsiortarfimmi sananeqaatsit nutaaliaanerusut qanganitsallu nalunaarsorneqarlutik. Nunami sulineq aavarfiunnginnerani aallartineqarpoq taamaalillunilu inunnik najorneqartarsimanerinik takussutissat tigussaasut sammineqarnerullutik.
Suliniut nunamik assaaneruvoq, uumasunik misissuineruvoq oqaluttuarisaanermullu tunngasuulluni aammalu siusinnersukkut misissuinerit aavartarnermit nutaaliaasumit isiginnittaasermut sanilliulluarneqarsinnaasoq takutinnikuummassuk, ukioq manna aasaanerani nunami sulinermi nunanit allanit sunnerneqarsimanermik pisinnaasunik assaanerit pingaartinneqarnerussapput. Tamanna ilaatigut apersuinertigut aamma ullumikkut inunnik aasiffimmik atuisartunik video atorlugu uppernarsaatinik pissarsiniarnermik ingerlanneqassaaq.
- Suliniummi Sisimiut Katersugaasiviat aamma Maniitsup Katersugaasivia peqataassapput. Nunap timaani piniartarneq pillugu Maniitsup Katersugaasivia 2011-mi ataavartumik saqqummersitsissaaq, tamatumani ilisimatusarluni suliniummi aamma nunatami siusinnerusukkut assaasimanernit inernerit ilanngunneqassallutik. Taamak Maniitsup katersugaasiviani pisortaq Tea Dahl Christensen oqaluttuarpoq.