Ulluni aggustip 23-aniit 27-anut Maniitsumi pisoqangaatsiarpoq. Qeqqata Kommuniata kommunalbestyrelsia tamarmiulluni, nunaqarfinni aqutsisut siulittaasui tamarmik, qullersaqarfimmi sulisut pisortaqatigiillu Maniitsumi ataatsimiinnerni ammaanersiornernilu peqataapput.
Marlunngornerup ualiani siallialukkaluaqisoq, nasiffiup nutaap ammarnersiorneranut inuit 50-it peqataapput. Arfernik nasiffik Maniitsumi Tunoqqusaami immamut qaninnerpaami inissitaavoq, tassa ikaartarfiusaq pisuffissiaq marlunnik annerusunik ataatsimoortarfiligaq. Tassanngaaniit aasakkut pingaartumik qipoqqaat isiginnaassallugit periarfissaqarluassaaq, tamakkumi Maniitsup eqqaa tamanna aqqusaarluartarmassuk. Ukiorli kaajallallugu Maniitsumi innuttaasunit eqqissisimaarfissatut orninneqarsinnaajuassaaq, taannami immamut qaqqanullumi Maniitsup eqaaniittunut isikkivigissuummat.
Pingasunngornermi Borgmesterip Hermann Berthelsen-ip Maniitsumi kommunip allaffissuani saqqummersitsineq ammarpaa. Saqqummersinneqartullu tassaallutik Maniitsoq piujuaannartitsinissaq eqqarsaatigalugu qanoq ineriartortinneqarsinnaanersoq pillugu isummat siunnersuutillu, illoqarfiup qeqqani sanaartoriaatsit ineriartortitsinerillu nutaat, tassa norskit arkitektiisa 70°N-imik taaguutillit nalunaarusiaanneersut.
Unnukkut Eqqarsaatersuutit Periarfissallu pillugit 70°N-ip nalunaarusiaaniittut Qeqqatalu Kommuniani Pilersaarusiornermi periusissat – Eqqarsaatersuutit oqallisissiallu tunngavigalugit iluatsilluartumik innuttaasunik ataatsimiititsisoqarluni. Innuttaasut 130-t missaat ataatsimiititsinermi peqataapput, tassanilu Arkitekten Gisle Løkken-ip 70°N-imeersup periarfissat pillugit nalunaarusiaq saqqumiullugu, kiisalu Borgmesterip Hermann Bertelsen-ip Pilersaarusiornermi periusissat saqqumiullugit. Uninngallatsiartoqareermat saqqumiussat pillugit innuttaasut politikkerillu immikkoortunut arfinilinnut avitat akornanni eqeersimaartumik oqallittoqarpoq, tassa ataatsimiititaliat amerlaqatigisaannut avitat.
Sapaatip akunnerata ingerlanerani aamma kommunalbestyrelsi ataatsimiippoq, missingersuutillu pillugit isumasioqatigiillutik, tamatumanilu kommunip siunissaa pillugu pisariaqartut assigiinngitsorpaaluit oqallisigineqarlutik.
Sisamanngornermi kommunalbestyrelsimi ilaasortat ataatsimoornertik naggaserlugu Napasumut Atammimmullu tikeraarput, tamatumanilu Pilersaarusiornermi periusissat innuttaasunik ataatsimiititsinerni ingerlanneqarlutik. Ataatsimiititsinerit marluullutik innuttaasunit eqeersimaartunit peqataaffigineqarluarput, taakkulu oqalliseqataalluarlutik.
Qeqqata Kommuniata neriuutigivaa, aamma taamatulli: Kangaamiut aggustip 30-ni nal. 19.00 Timersortarfeeqqami, Itillimi aggustip 31-ni nal. 16.00 Katersortarfimmi, Sarfannguani aggustip 31-ni nal. 19.30 Katersortarfimmi kiisalu Sisimiuni septembarip 1-ani nal. 19.00 Taseralimmi innuttaasunik ataatsimiititsinissat peqataaffigilluarneqarumaartut.