Apisseq ingeniørinngornianut Sisimiuni inissiaq seqinnarissuup ataani ippassaq pingasunngornermi aggustip 18-ni 2010-mi siunissami isumalluarnertitaaqaluni pisortatigoortumik atoqqaartinneqarpoq.
Apisseq Hillerød-imi Sct. Georgs Gilderne-t isumassarsiarineqarluni Issittumi Teknologi Centeri Qeqqatalu Kommunia suleqatigalugit ingerlanneqarpoq. Sanaartornissaalu piviusunngortinneqarluni aningaasaateqarfiit marluusut VILLUM FONDEN og A.P. Møller og Hustru Chastine Mc-Kinney Møllers Fond til almene Formaal ajunngisaarlutik aningaasaliissuteqarnerisigut.
Atoqqaartitsinermi Kulturimut, Ilinniartitaanermut, Ilisimatusarnermut Ilageeqarnermullu Naalak¬kersuisup Mimi Karlsen-ip inissiaqarfiup pilersinneqarnera nuannaarutigalugu oqaaseqarpoq. Ilinniartunut inissiat pitsaasut Namminersorlutik Oqartussat ilinniartitaanermik ineriartortitsinermillu pingaartitsinerannut naleqqulluartuuvoq.
Borgmesteri Hermann Berthelsen Kalaallit Nunaanni ilinniartitaanermut atatillugu ilinniagaqarfiit annersaata Qeqqata Kommuniani inissisimanera tulluusimaarutigilluinnarpaa, piffissarlu iluatsillugu oqaatigalugu, ilinniakkat ingeniørinngorniarnermi ilinniakkatut ittut qanoq pingaaruteqartiginerat. Tamatumuuna pissutsini immikkut ittuni ineriartortitsinikkut atuilluarnerusinnaanikkullu periarfissat ammaanneqartarput, tassa Kalaallit Nunaanni Issittumilumi inissialiornerit sanaartornerillu eqqarsaatigalugit. Borgmesteri Hermann Berthelsen-ip kalaallit inuusuttut pilluaqquai, neriuutigilluinnarlugu ilinniarfissatigut periarfissarpassuarnik atorluaanissaat.
Apisseq tassa Nannup ukiisarfia, tamanna illorsuup iluliumaneratigut takussutissaqarluni.
Ajoraluartumik inissiaq suli naammassivinneqarnikuunngilaq, taamaakkaluartorli ilinniartunut inissiaqarfiup atoqqaartinnissaa aalajangiusimaneqarluni, iserterfigineqarnissaalu septembarip 1-ani 2010-mi pissalluni. Naatsorsuutigineqarporlu inissiat novembarimi 2010-mi naammassivinneqarsimanissaat.