Ukiuni tulliuttuni Sisimiuni meeqqat atuarfii marluullutik annertuumik nutarterneqassapput.
Taamaattumik Minngortuunnguup Atuarfiata allanngortiterneqarnissaa nutarterneqarnissaalu kommunip siunnersortaannut illussanik titartaasartunut oktobarimi unammisitsissutigineqarpoq. Decembarip pingajuani neqeroorutinik assigiinngitsunik soqutiginartunik pingasunik kommuni tigusaqarpoq.
Sapaatip akunneri kingulliit marluk pilersaarut assigiinngitsutigut ulapputigineqarpoq, matumani atuarfimmi sulisut, atuarfimmi siulersuisut atuarfiillu nutarterneqarnissaat pillugu ataatsimiititaliaq pilersinneqarnikoq ajugaasussamik toqqaaniarlutik nalilersuisimallutik. Siullermik atuarfimmi sulisut aggersarneqarnerisigut ataatsimoortumik nalilersuisoqarpoq. Ilutigalugu atuarfimmi siulersuisut namminneerlutik siunnersuutinik taakkunannga pingasunik nalilersuipput. Kingullertut atuarfiit nutarterneqarnissaat pillugu ataatsimiititaliaq nalilersuivoq.
Illussanik titartaasartunik unammisitsineq suliffeqarfiit kikkuunerinik saqqummiussinertaqanngitsumik ingerlanneqarpoq, taamaattumillu ajugaasoq toqqarneqarmat aatsaat suliffeqarfik sorleq ajugaanersoq tusarliunneqarluni.
Unammisitsinermi Kitaa Arkitekter Sisimiut A/S Rambøll Grønland, Sisimiut suleqatigalugu ajugaavoq.
Pilersaarut ajugaassutaat siunnersuutillu sinneri 2010-mi decembarip 22-ani kommunip isaariaani saqqummersinneqassapput, Sisimiut.
Pilersaarusiornermi ajugaasoq siunnersuutillu allat marluk matuma kinguliini takukkit:
Siunnersuut ajugaatinneqartoq
Siunnersuut nr. 62742
Siunnersuut nr. 12124