Isertitat 2023-mut sanilliullugit 63mio. kr.-nik qaffariarsimapput, tamatumani ilaatigut annertuumik sanaartortoqarluarnera pissutigalugu innuttaasut akileraarutaat 37mio. kr.-nik qaffariarsimallutik.
Ingerlatsinermut aningaasartuutit 2023-mut sanilliullugit 23mio. kr.-nik qaffariarsimapput. Ukiullu kingulliit arfinillit ingerlaneranni ingerlatsinermi aningaasartuutit 159mio. kr.-nik qaffariarsimapput, taakkunannga 113mio. kr inunnik isumaginnittoqarfimmut tunngassuteqarlutik.
Akissarsianut aningaasartuutit 12.4mio. kr.-nik qaffariarsimapput.
Sanaartorneq eqqarsaatigalugu 93mio.kr. atorneqarsimapput, ukiup siulianut sanilliullugu 13mio. kr.-nik qaffasinnerullutik.
Naatsorsuutit pillugit borgmesteri Malik Berthelsen, imatut oqarpoq;
”Sinneqartooruteqarnerput soorunami iluarisimaarpara. Tamatumunngalu sulisinnaasut amerlanerpaat sulinerannik pissuteqarpoq, taamaattumik innuttaasut suliffeqarfiillu sulilluarsimanerannut qutsavigaakka. Sinneqartooruteqaraluarlutali suli aningaasaqarnikkut sukannersumik ingerlatsinissarput pisariaqarpoq. Pissutigalugu sanaartornerit annertuut Sisimiuni naammassititilerput, Kangerlussuarmi sulisorpassuit annaanikuuvagut aammalu aalisarnermiit isertitat nalorninartumiillutik. Taamaattumik akileraarutitigut isertitat qaffakkiartuinnarnissaat naatsorsuutigisinnaanngilarput.”
”Illuatungaanilu inunnik isumaginninnerup iluani aningaasartuutit qaffakkiartornerat aammalu kommunip illut/suliffeqarfiit pigisai ukiuni tulliuttuni aserfallatsaalineqarnissaminnik pisariaqartitsisut annertuunik aningaasartuuteqarfiunissaat sillimaffigisariaqarpagut”, borgmesteri Malik Berthelsen, taamak naggasiivoq.
Paasissutissat sukumiinerusut |Yderligere information
Borgmester
Malik Berthelsen
E-mail: mabe@qeqqata.gl
-
Kommunaldirektør Hans Christian Svärd
E-mail: hcsv@qeqqata.gl