Qatserisartutut ukiuni 25-ni suliaqareersimallutik qatserisartut pisortaat Jørgen Berthelsen, qatserisartoq Gerth Heilmann kiisalu qatserisartoq Arkaluk Hansen pingasunngornermi marsip 16-i 2011-mi qatserisartutut sulisimanerminnik nersornaaserneqarput. Nersornaatinik tunniussisuuvoq kommunalbestyrelsimi ilaasortaq Karl Davidsen (S). Maniitsumi taamatut nalliuttorsiualaarneq kommunalbestyrelsip ataatsimiittarfiani ingerlanneqarpoq.
Gerth Heilmann-i Arkaluk Hansen-ilu ukiut 25-it ingerlanerini Maniitsup qatserisartuiniissimapput, tassanilu annertoorujussuarmik suliaqartarsimallutik. Jørgen Berthelsen-ip taamatut suliaqarnini Maniitsumi aallartippaa, tamatumalu saniatigut ilaatigut mittarfeqarfinni ukiualunni suleriarluni, Maniitsumut uteqqissimalluni, ullumikkullu qatserisartunut pisortanngorsimalluni.