Qeqqata Kommuniani meeqqat atuarfii nukittorsarumallugit atuartullu atuarnerisa pitsanngorsarneqarnissaat siunertaralugu, 2011-mi marsip 11-ani 12-ianilu meeqqat atuarfii immikkut sammineqarput. Kommunimi nunaqarfinnit illoqarfinniillu katillugit 60-it sinnerlugit peqataapput. Politikerit, atuarfimmi sulisut, atuarfinni siulersuisut sinniisui, allaffeqarfimmi sulisut atuartullu sinniisaat Ilinniartitaanermut, Kulturimut Sunngiffimmullu ataatsimiititaliap Taseralimmut aggersarpai. Isumasioqatigiinnermi ilaatigut atuartut qanoq ittuuneri, meeqqat atuarfiisa aningaasaqarnerat ilinniartitsisullu pikkorissartarnerat oqallisigineqarput. Peqataasut arlaleriarlutik suleqatigiinnut avinneqarlutik aalajangersimasut pillugit oqallipput, oqallinnermilu qaqilerneqartut isumasioqatigiinnermi tamanut saqqummiunneqarlutik.
Angajoqqaat, ilinniartitsisut, atuarfimmi aqutsisut allaffeqarfillu unammillernartunik assigiinngitsutigut suliassaqartut isumasioqatigiinnermi paasineqarluni isumasioqatigiinneq pissarsiffiullunilu iluaqutaavoq.
Pitsaasunik arlalinnik saqqummiussisoqarpoq. Ilaatigut atuartut ilinniartitsisullu atuartitsinermik ataatsimoorussillutik, pitsaasumillu imminnut pisarnissaannik atuartut siunissami atuarfimmik takorluugaat atuartut sinniisaasa oqaluttuaraat. Meeqqat atuarfianiit ingerlariaqqiffittut ilinniarfinnut pitsaanerusumik ikaarsaariarfiunissaat ilaatigut suleqatigiissitat eqqartorpaat. Meeqqat atuarfii pillugit peqqussut atuarfimmi sulisut ilaata oqaluttuaraa, paragraffillu ilaat qanoq timitalerneqarsinnaanersut assersuusiorluni. Isumaginninnikkut iliuuseqarnissaq, naqinnernik ilisarinninngissinnaaneq ilinniaqqinnerlu politikerit eqqartorpaat. Atuartut qanoq ittuunerinik misilitsinnermilu angusanik Inerisaavik ilassutitut paasissutissiivoq.
Isumasioqatigiinnerup kingona atuarfimmi pisortat tullersortaallu tamarmik
Inerisaavimmit siunnersortinik ilalerlutik ataatsimoortumik anguniagalersorput.
Tassunga atatillugu atuartitseriaatsinik soqutiginarluinnartunik Inerisaavik
oqaluttuarpoq kiisalu nunaqarfimmi atuarfimmi meeqqanik angajoqqaanillu
suleqateqarnermik atuarfimmilu pisortaq assersuusiorluni. Atuartitsinermut
atuartunullu pilersaarsusiornissami iliuusissamillu pilersaarusiornissami
atuarfiit assigiinngitsunik sakkussarsipput.
Iliuusissatut pilersaarutinik
suliniarfissanillu allaffeqarfiup tungaanit ingerlateqqinneqartussanik,
kingusinnerusukkullu politikerinit eqqartorneqartussanik ullup ingerlanerani
atuarfimmi pisortat siunnersuuteqarput.
Kommunimi tamarmi atuarfeqarfiit qanoq ingerlanersut ataurfiit pillugit
2011-mi isumasioqatigiinnermi ersarissarneqarpoq, maannalu siunissamut suut
sulissutigineqassanersut politikkikkut takujuminarsinerullutik. Tamatuma
saniatigut meeqqat atuarfiinut atuarfinnilu nukissat sumut atorneqarnersut
pillugit politikerit takunnissinnaanerulerput. Taamatuttaaq peqqussut
aallaavigalugu atuartut atuarnertik sutigut iluaqutigineraat ersarissarneqarpoq.
Atuarfiit pillugit isumasioqatigiinnermi angusat iliuusissatullu pilersaarusiat
Kommunalbestyrelsip apriilip 28-ani ataatsimiinnissaanut
saqqummiunneqassapput.