Piareersarfiup neqeroorutai amerlasuunit
ingerlariaqiffissatut toqqarneqartarput, amerlasuutigullumi
pissarsiffiulluartumik. Pingaartumilli inuusuttunut nunaqarfinneersunut
naamassinninniarneq ajornakusoorsinnaasarluni, aammalu ilinniakkamik sumut
qanorlu atornissaata anguniarnissaa eqqarsaatigalugu.
Kangaamiuni
ersarissumik anguniagaqarfiusumik Piareersarfik ilinniagaqarnianut
naleqqussarlugu ineriartortinneqarsimavoq. Tamatumalu kingunerisimavaa,
sapinngisatigut qaffassaanerit ilinniaqqinnianullu piareersarnernik
pikkorissartitat tamangajalluinnarmik naammassinninnerat.
Tamakkiisumik isiginnissinnaaneq aallaavigalugu Kangaamiuni ilisarititsineq ingerlanneqarsimavoq, tamatamani ilinniartut akisussaafeqarnerup unamminartuinik aqqusaagaqartillugit, ilinniarnissaq kisiat eqqarsaatiginagu, namminerli inuunerisaq ilanngullugu. Ullut 14-t ingerlanerini ilinniartut nammineq inuttut inooqataasutullu pissarsisimapput, aammalu pissutsit qanoq iliuuseqarfiginissat ilinniarlugu, immaqa siusinnerusukkut ajornarluinnartutut isigisarsimasaraluatik Tassalu nammineq naleqassuseq imminullu tatigineq aqqutigalugit, siunissamut nukissaqalernissaq aallanisarlugu. Ilinniartut Piareersarfimmiinnerisa nalaani, aamma inuttut ataasiakkaarlutik periarfissaasigut ilitsersuunneqartarput, suut eqqarsaatigineraat suullu inuttut aningaasaqarnikkullu pilliutigisariaqassaneraat. Tamakku aqqutigalugit ilinniartut sakkussaannik tunineqartarput, tassa ilinniakkamik piumasaqaatitaat ilisimaarinerulinniassammatigit, aammalumi Piareersarfimmi ilinniarnerminni anguniagassamikkut ilisimaarisassat annertusinniarlugit.
Kangaamiuni Piareersarfik Maniitsumi Piareersarfiup ataaniippoq, pisortaalu Kunuunguaq Olsen aaqqissuussinermik naammagisimaarinnilluarluni, piffissarlu alimasinnerusoq isigalugu neriuutigalugu sinerissami allani pitsaasumik sakkussamik aqqutissiuussiqataasimassallutik.