15-issaanik ACR-eqarnissaq ukioq manna ingerlanneqangajalerpoq. 2011-mi ACR-eqarnissaq nalliuttorsiornerussaaq, nunaniillu assigiinngitsunit 14-init peqataasussanut 116-inut immikkukajaaq aaqqissuussisoqarnissaa pilersaarutigineqarpoq. Apriilip 8-ni nal. 10.00 Nalunnguarfimmit SSP illuaraata eqqaaniit aallakaassapput. Ammaanersiorneq nal. 09.45 aallartissaaq, ammaanersiornermullu nuannersuutitsiseqataanissamut innuttaasut kikkulluunniit tikilluaqqusaapput.
Peqataasut nunap timaanut aallannginnerminni pisarneq mallillugu Sisimiut illoqarfiat aqqusaaqqaassavaat. Peqataasut aallartiffik eqqaqqutinnginnerani illoqarfiup iluatigooqqaalassaapput. Saneqquasoqarnerani innuttaasut nunaqqatiminnik, illoqarfinni allaneersunik, pissartanik tusaamasanillu illersuinissamut periarfissaqassapput.
Ukioq manna oqilaniunnissarsarsuaq nunarsuaq tamakkerlugu immikkut maluginiarneqartorujussuussaaq. Taamaalilluni 2011-mi ACR-eqarnerani Sisimiut nunanit allaneersunit amerlaqisunik tikeraarteqassaaq. Innuttaasut tamakkerlugit tikeraanut tamanut pisarnermissut ilunngunartumik inussiarnisaarnissaat kajumissaarutigineqassaaq.
MIKI ACR
Arfinngorneq sapaallu meeqqanut MIKI ACR
pisarneq malillugu ingerlanneqassaaq, meeqqallu kikkulluunniit
peqataasinnaapput. Annertunerusumik paasissutissanut tunngatillugu illoqarfiup
iluani allagartat nivinngaassorneqarsimasut takukkit.
Ujakkaartartorsuit tikisinneqartut
Ukioq manna ACR-ip
nalliuttorsiutigineqarneranut atatillugu immikkut ittunik marlunnik
tikisitsisoqassaaq, taakkulu Rusland-imiit Schweiz-imiillu tikissapput.
Ilia
Chernousov Rusland-imeersoq, inuusuttuuvoq ujakkaarnermi
siunissagissaarluinnartoq. Qanittumi Oslo-mi 30 km-imut Silarsuaq tamakkerlugu
oqilaniuunnermi bronze-nnappoq.
Reto Burgermeister Schweiz-imeersoq, 90-ikkut
naajartorneranniit 2006 tikillugu Schweiz-imi ujakkaarnermi oqilanerpaajuvoq.
World Cup-imi marloriarluni akissarsisinneqarnikuuvoq, 9-riarluni
nationalmester-iuvoq, 3-riarluni Olympiade-qataanikuuvoq, kiisalu 6-riarluni
Silarsuaq tamakkerlugu pissartanngorniuteqataanikuulluni.
ACR-imut aningaasaliisut piumassutsimillu ikiuuttut
Aningaasaliisoqanngippat ACR ingerlanneqarsinnaanngilaq.
Piumassutsimillu ikiuuttartunut tunngatillugu taamatut oqartoqarsinnaavoq,
taakkumi ACR-eqarnerani ukiut tamarluinnaasa suliassaq annertooq isumagisarpaat.
Ukioq mannalumi kingumut ikiuuttoqarluarniarpoq, piumassutsimimmi ikiuuttussat
170-it miss. aaqqissuussamik ingerlatsisuussapput. Qeqqata Kommunia Air
Greenland-ilu ACR-imut aningaasaliisuupput. Taakku saniatigut arlalissuarnik
aningaasaliisoqarpoq, taakkoqanngippammi oqilaniuunneq
piviusunngorsinnaanngilaq.