Borgmester Hermann Berthelsen-p Kommune Kujalliup siunnersuutaa taperserpaa, tassalu Naalakkersuisut Siulittaasuata Kuupik Kleist-p Issittumi Sakkutooqarfiup sumi inissinneqarsinnaaneranut periarfissanik misissueqqaaqqullugu oqaatigisaa.
Qeqqata Kommuniata neriuutigaa Nalakkersuisut Siulittaasuata Illlersornissamullu ministerip Sisimiuni Kangerlussuarmilu Issittumi sakkutooqarfiup ataqatigiissup inisssiinissat pillugu misissuinissaat.
Hermann Berthelsen-p oqaatigaa nunap suugaluartulluunniit pitsaasumik illisorneqarnissani anguniarlugu sakkutuut timmisartortartut, imarsiortut sakkutuullu ataqatigiissumik suleqatigiinnissaata pingaassusianik. Tamannalu Sisimiuni Kangerlussuarmilu anguneqarsinnaavoq.
Atlantikup Avannaani timmisartukkut illersornissaq Kangerlussuarmiikkuni pitsaanerusumiissinnaanngilaq. Nunarsuarmi mittarneq patajaannerpaat ilagaat takinerpaallu ilaannik mittarfeqarluni.
Sisimiuni Kangerlussuarmilu sakkutuut pitsaanerrusumik inissinneqarsinnaanngillat, aammami aasaanerani taakku akornanni aqqut pisunniartunit ornigarneqartupilussuusarpoq, ukiuuneranilu sisorartartunit, qimussinit qamuteralannillu angalaffigineqartarluni. Sakkutuunit qimussersunut Siriusinut ukioq kaajallallugu Kangerlussuarmiit Sermersuaq tikinneqarsinnaavoq sungiusarfigineqarsinnaallunilu il.il.
Sisimiut Kangerlussuullu akornanni nunarujussuaq kalaallit amerlanerusut sakkutuunngorniartinneqarsinnaapput. Nunami tassani qimusserpassualimmi qamuteralappassualimmilu taakkunatigut piginnaasat aallaaviusinnaapput, taakkumi nunatsinni ilitsoqqussaraavut. Aamma Kalaallit Nunaannut nammineq napatittumut nunatsinni sakkutooqarnikkut akuunerulernissarput anguniassallugu pissusissamisuuginnarpoq, borgmester Hermann Berthelsen oqarpoq.
Sakkutuunut imarsiortunut Sisimiuni ukioq kaajallallugu ammasumik umiarsualiveqartoqarnissaq pitsaalluinnarpoq. Taanna sikuneq ajortumi avannarpasinnerpaavoq, Sullualummut qaninnerpaa-julluni, Qeqertarsuup eqqaani uuliaqarfimmut Qalasersuarmullu qaninnerpaalluni. Aamma Sisimiut sikuneq ajortuugami Ilulissanut umiarsuit takornariartaatsit tikinnerpaasarfianut qaninnerpaavoq, taamaattumik Sisimiut sakkutuunik imarsiortunik inissiffigissallugu tulluarnerpaavoq, taamaalilluni umiarsuit takornariartaatsit ajutoornerisigut qaninnerpaalluni.
Sisimiut Kangerlussuarlu ataatsimut isigalugu inissiiffigissallugit
pissusissamisoornerpaavoq, siunissami qanittumi Naalagaaffeqatigiinnerup
Sakkutooqarfiata sumi inissisimanissaa aalajangerneqalerpat.
Qeqqata
Kommuniata naatsorsuutigaa Naalakkersuisut Siulittaasuat Illersornissamullu
ministeri minnerpaamik Sisimiut Kangerlussuullu Issittumi sakkutooqarfimmik
ataqatigiissumik pilersitsinissami pitsaaqutaat misissussagaat., Hermann
Berthelsen naggasiivoq.