Qimminik toqoraasarneq pillugu 2011-mi junnip 16-iani Sivleq
saqqummiussaqarpoq.
Taama pisoqarnera Qeqqata Kommuniani, Teknikkimut
Avatangiisinullu immikkoortortaq ajuusaarutigineqarpoq. Soorunalimi qimmilerisut
tamarmik tamanna pinngitsoorusuttarpaat. Naammagittaalliuutip imaluunniit
aviisiliortup allagaq ilanngutinnginnerani akissuteqarnissamut, taamaalilluni
taanna kommunip akissuteqaatissaanik imaqarniassammat
piffissalerneqarsimannginnerput ajuusaartigaarputtaaq.
Sisimiuni qimminit 1400-suniit kommuni qimminik ukiumut 190-210-nik toqutsisarpoq. Qimmiliviit qimmiutillillu tamaasa aqunniarlugit qimmilerisut tamaviaartut nalorninanngilaq, aamma qimminik angalaannartoqartillugu. Piffissamili ataatsimi qimmit angalaannartut arlalinngoraangata, piffissap ilaani tamakkuninnga pisoqarsinnaasarlunilu kukkusoqarsinnaasarpoq. Qimmeq angalaannartoq takuinnarlugu kia pigineraa paasineqarsinnaanngilaq, taamaattumillu piginnittuusinnaasup nassaariniarneranut qimmilerisut piffissaangaatsiamik atuisinnaasarput, tamaattumillu piginnittut sapinngisamik piaartumik qimmilerisunut nalunaaruteqartarnissaat pingaaruteqarpoq.
Qimmit angalaannartut toqqissisimanarinagit innuttasuniit qimmit angalaannartut pillugit ukiumut 75-100 missaani saaffiginnissutinik Qeqqata Kommuniani, Teknikkimut Avatangiisinullu immikkoortortaq tigusaqartarpoq. Qimmilerisup tamatigut piginnittoq kinaanersoq paasiniaqqaartarpaa saaffigalugulu, kisianni ilaanneeriarluni taanna iluatsinngitsoortarpoq.
Piginnittut qimminik angalaannartunik peqarnerarlutik ilisimatitsissuteqartut qimminut pullatinik tunineqarsinnaapput, taamaalillutik nammineq tiguniarnissaanut periarfissinneqarlutik. Uani pineqartumi piginnittoq qimmeq angalaannartoq pillugu qimmilerisumut ilisimatitsissuteqarsimangilaq, taamaalillunilu qimmilerisoq arnap qimmiutigisai pineqartut paasinissaanut periarfissaqarsimanani.
Qimmilerisup qimmeq imminut qammarsinnaanerlugu misileqqaartuaannarpaa, qimmerlu toqutassaappat sapinngisamik qanilliniartarlugu. Uani pisumi aamma taamak pisoqarpoq.
Qimmilerisoq ulloq taanna qimminik marlunnik tigusiniaavoq, taavalu qimmeq taanna Aqqaluartaap Aqqutaani takullugu, takusinnaallugulu niviarsiaqqat marluk qimmeq ersigigaat. Piginittumiit qimmeq taanna pituussaaqqasoq pillugu qimmilerisoq ilisimatinneqarnikuunngilaq, qimmilerisullu qimmeq taanna ilisarinngilaa. Uani pisumi qimmilerisoq qimmimut qanillivoq, kisianni aallaanninnerup nalerpiaani qimmit illuarsinnaasarput. Tamatumalu kingorna qimmeq qimmeqatiminut qimaavoq, saassunneqarlunilu qimminillu allanik paaneqalerluni. Tamatuma kingorna qimmeq qimmit illuaraaniit anillatseriarlugu qimmilerisup niaquatigut aallaavaaa.
Qeqqata Kommuniani Teknikkimut Avatangiisinullu immikkoortortami qimmilerisut qimmmimik tigusiniarnermi imaluunniit toqutsilernermi amerlasoorpassuarnik isummerniartartussaagamik sulinerminni ulapaartorujussuusarput. Qimmilerisussanik nutaanik sungiusaaneq qimmiliviit amerlammata aammalu qimmiutillit ilinniagassaasarmata piffissami sivisuumi pisarpoq. Qimmilerisutsinnut Teknikkimut Avatangiisinullu immikkoortortarput tatitiginnittorujussuvoq, qimmillu angalaannartut tiguniartarnissaanut toqunneqartarnissaallu pillugit paasisitsiniaallutik annertuumik sulisartut isumaqarluni.
Qimmiutilimmut taarsiiviginninnissamik Qeqqata Kommunia akiliinikuuvoq.
Kommunip qimmilerisuinik misilittakkat qimmnillu angalaannartunik
ajornartorsiutit qanoq qaanngerneqarsinnaaneri pillugit Qeqqata Kommunia
ilaatigut peqatigiiffimmut Qimussermut tusarniaassuteqarpoq. Ataatsimummi
isigalugu qimmilerisut ajornartorsiutaanngillat, illuatungaatigulli qimminik
pituussaartoqarsimatillugu piginnittut paasissutissanik pisarialinnik
tunniussaqartannginnerat taamaalillunilu pisut taamaattut pinngitsoornissaagalui
ajornartorsiutaallutik.