Marlunngormat aggustip 2-ani 2011-mi kommuni Maniitsumi bussinik ingerlatsilerpoq. Ulloq siulleq iluatsilluaqaaq, ilaasoqarluaqalunilu. Qularutissaanngivipporlu innuttaasut amerlasuut, pingaartumillu meeqqat bussit nutaat marluusut arlaat misilikkusussimagaat.
Qeqqata Kommunia bussinik ingerlatsinermi tunuliaqutaavoq, ingerlatsinerli namminersortumut biiliutilimmut Karl Therkeldsen-imut suliariumannittussarsiuussinikkut ingerlanneqartussanngortinnikuullugu. Taamaalillunilu Qeqqata Kommuniata kommunimip najugaqarfiini anginerni pingasuni, Sisimiuni, Maniitsumi Kangerlussuarmilu suliariumannittussarsiuussinertigut bussinik ingerlatsineq namminersortunut ingerlatilertissimalerlugu.
Maniitsumi bussinik ingerlatsineq bussinik nutaanik marlunnik siunertamut pisinikkut iluatsinneqarpoq. Issiaviit 24-inut inissaqarlutik nikorfasullu 10-t, bussillu marluullutik innarluutilinnut naleqqusagaallutik. Bussit marluullutik angallatileruttornerup nalaani ullaap-tungaani nal. 6.30-imiit 9.30-imut ualikkullu nal. 15.00-imiit 18.00-imut ingerlasassapput. Ullup sinneranilu bussi ataasiinnaq ingerlasassalluni. Taamatullu sapaatip akunnerisa ullui tamaasa sapaat kisiat pinnagu ingerlasoqartassalluni.
Siusinaartumik nalinginnaasumillu pensionisiallit bussinut akeqanngitsumik ilaasinnaapput, taamatuttaarlu atuartut atuarfimmiit ungasissumi najugallit atuarnerup nalaani ilaanissamut allagartamik pisinnaallutik.
Bussit ingerlasarnissaannik pilersaarut uani takuuk.