Qeqqata Kommuniata kommunalbestyrelsia ullumi isumaqatigiilluni Sisimiuni Umiarsualiviup tallineqarnsisaa aalajangiiffigivaa. Ilutigitillugu kommunimut akileraarutip 25 procentimiit 26 procentimut qaffanneqarnissaanut siunnersuut isumaqatigiillutik akuersissuteqarfigaat. Akileraarutinik qaffaaneq ilaatigut umiarsualivimmut 2012-imi 2013-imilu sanaartorneqartussamut aningaasalersueqataassaaq.
Umiarsualiviup tallineqarnissaanik eqqartuineq aallartinneqarpoq, sapaatip akunnera kingulleq aningaasaqarnermut ataatsimititaliap Sisimiuni umiarsualiviup tallineqarnissaa siunnersuutigimmagu, taamaalilluni 2013-ip aasaani uuliasiortoqarsinnaaneranut piareersimaniassammat.
Sisimiuni umiarsualivimmi pissutsit taamaatsillugit kilisaatit, tunitsiviit, umiarsuit takornariartaatit umiarsuillu uuliasiortunik sullissisut umiarsualivimmi inissaqanngillat, taamaalillutillu nunatta iluani nunanilu allani umiarsualivissarsiortarlutik. Umiarsualiviup tallineqarneratigut allanngortinneqassapput.
Kommunalbestyrelsip aalajangiinera pillugu Qeqqata Kommuniani borgmesteri
Hermann Berthelsen iluarisimaarinnippoq:
- Umiarsualiviup
allilerneqarnissaanut kommunalbestyrelsi tamarmiusoq isumaqataanera
pitsaasuuvoq. Ingerlariaqqinnissami politikkikkut tapersersorneqarneq
pingaarutilerujussuuvoq. Suliamik aallartitsisinnaanerput nuanneqaaq, taamak
oqarpoq.
Umiarsualiviup allineqarnissaa pillugu innuttaasunik
ataatsimiititsineq
Kommunalbestyrelsip ullumi aalajangiinera
tunngavigalugu, ataasinngornermi oktobarip 31-ani 2011-imi nal. 19.00
umiarsualiviup allilerneqarnissaa pillugu kommuni innuttaasunik
ataatsimiititsinissamut qaaqqusivoq. Ataatsimiinneq Sisimiuni kulturikkut
illorsuarmi Taseralik-mi ingerlanneqassaaq. Ataatsimiinnermi umiarsualivimmik
alliliinissaq pilllugu innuttaasut apeqquteqarnissaminnut periarfissaqarput.