Sisimiut Timersortarfiani nal. 19.00 assammik arsarluni U-19 GM-i sisamanngorpat pisortatigoortumik aallatinneqalerpat, Qeqqata Kommuniani borgmesteri Hermann Berthelsen ammaanersiorluni oqalugiassaaq.
Unamminerli siulleq nal. 16.30 aallatinneqassaaq.
Meeqqanut inuusuttunullu pissartanngorniuunnerni arnat angutillu holdit sisamat unammiuaassapput, pissartanngorniunnermilu ajugaanniutivinnerit sapaammi ualikkut ingerlanneqassallutik.
Sisimiuni S.A.K. assammik arsartartuisa ukiup aappassaa U-19 GM-imik ingerlatsissaaq, tamannalu aaqqissuussaq borgmesterip nuannaarutigalugu tapersersorpaa.
- Sunngiffimmi sammisaqartitsinissamik pitsaasumik neqerooruteqarsinnaanerput, soorlu assammik arsarneq, meerartatsinnut inuusuttortatsinnullu pingaaruteqarpoq. U-19 GM-ertitsisarnerup sunngiffimmi sammisaqartarnermut kajumissaarisuullunilu qiimmatsannartuuvoq. Illoqarfimmi assammik arsartartuisa unammiuaarnernik aaqqissuussisinnaanerat Sisimiut kulturianut namminersorlutillu inuutissarsiortunut iluaqutaavoq, taamak borgmesteri oqarpoq.
Holdit assigiinngitsut qanoq innikkut unammiuaassanersut unammiuaarnissamut programmimi takusinnaavat.
Annertunerusumik paasissutissat
Assammik arsarluni U-19 GM-eqarnissamut atatillugu annertunerusumik paasisaqarusukkuit, S.A.K. assammik arsartartut immikkoortortaanik siulittaasoq, Erik Jensen, oqarasuaatikkut 53 04 08-mut attavigisinnaavat.