Inuiaqatigiit kommunillu akornanni annerusumik naligiissitsinissaq pillugu ulluni kingullerni tusagassiutitigut oqallisigineqartoq aallaavigalugu Qaatsuitsup Kommuniani borgmesteri Simon Simonsen aamma Naalakkersuisunit Kuupik Kleist oqaaseqaateqarput.
Annerusumik naligiissitsisoqarnissaanik illuatungeriit oqaaseqarnerinut, Qeqqata Kommuniani borgmesteri Hermann Berthelsen isumaqataavoq. Eqqortunilli tunngaveqarluni oqallittoqartariaqarpoq.
Hermann Berthelsen-ip erseqqissarpaa, paasissutissat eqqortut saqqummernissaat pingaaruteqartoq.
- Naak, ulluni kingullerni tusagassiutitigut oqaatigineqaraluartoq Qeqqata Kommunia Kujallermut Qaasuitsumullu sanilliullugu annerusumik isertitaqartoq, annerusumik isertitaqanngilaq. Kommunini naatsorsuutit naapertorlugit Qaasuitsup Kommunianut aamma Kommune Kujallermut sanilliullugu 2010-mi 2011-milu isertitat innuttaasumut ataatsimut isertitagut assigiipput, taama Qeqqata Kommuniani borgmesteri naqissusiivoq.
| Innuttaasup ataatsip isertitai | Kujalleq | Qaasuitsup | Qeqqata | Sermersooq |
| 2010 | 53.724 kr. | 55.486 kr. | 55.713 kr. | 63.590 kr. |
| 2011 | 60.184 kr. | 61.507 kr. | 60.553 kr. | 66.345 kr. |
Kommunip akornanni naligiissaarinissamut periarfissat eqqartorneqassasut kaammattuivoq.
-iluarsiissutissat piviusut eqqartorneqarnissaat pingaaruteqarpoq. Kommunit akileraarusiisinnaatitaajunnaarsinneqarnerisigut kommunit annerusumik naligiissinneqarnavianngillat, illuatungaatigullu kommunit kiffaanngissuseqannginnerulerlutillu aalajangiinissaq qitiusumik inissisimallutik Namminersorlutik Oqartussaniissallutik.