Kommunip atuilluartuunissamik suliniutaani innuttaasut akuutinniarlugit suliniarnerani, Qeqqata Kommunia, Sisimiuni Teknikkimut Avatangiisinullu immikkoortortaq maanna radiokkut toqqaannartumik oqallinnissamut innuttaasut ataatsimiinnissaanut aggersaavoq.
2020-p tungaanut pilersaarutini pingaarnerni Qeqqata Kommuniata atuilluartuunissamik suliniutimini qaammatini makkunani innuttaasut akuutinneqarnissaat sammisarivaa. Tamannalu issittumi inuiaqatigiinni atuilluartuusunit qanoq isumassarsiaqarsinnaanerinut kommunip innuttaasut aperinerisigut ingerlanneqarpoq.
Ataasinngorneq decembarip 10-ani nal. 19:00-imiit 22:00 tungaanut Sisimiuni Sanaartornermut ilinniarfimmut innuttaasut ataatsimiinnissaanut aggersarneqarput. Ataatsimiinnissamut aggersaasuuvoq Teknikkimut Avatangiisinullu immikkoortortaq, tassani teknikkimut immikkoortumi atuilluartuunissami suliniutit saqqummiunneqarlutillu eqqartorneqassapput.
Periutsitut nutaatut innuttaasunik ataatsimiititsineq Sisimiuni Maniitsumi kommunillu nunaqarfiini tamani radiokkut toqqaannartumik aallakaatinneqassaaq. Nal. 20:15 aamma 21:00 akornanni innuttaasut sianernissamut periarfissinneqassapput, tassanilu kommunimi Teknikkimut Avatangiisinullu ataatsimiititaliap siulittaasua Hans Frederik Olsen suliniutit pillugit apeqquteqarfigineqarsinnaassaaq.
-Atuilluartuunissamik suliniutitsinnut innuttaasut sapinngisamik amerlasuut isummaminnik pitsaasunillu siunnersuutinik tunniussaqarsinnaanerat uagutsinnut pingaaruteqarpoq. Kisianni innuttaasut tamarmik innuttaasunik ataatsimiititsinernut takkunnissaminut periarfissaqarneq ajorput. Taamaattumik ataatsimiititsineq toqqaannartumik radiokkut aallakaatillugu innuttaasut amerlanerusut anguniarniarlugit misilinniarparput aammalu siunnersuutinut pitsaasunut isumassarsiaasinnaasunik oqarasuaatit ammassapput. Sapinngisamik amerlasuut oqaloqatiginissaanut qilanaarpunga, taamak oqarpoq Hans Frederik Olsen.
Atuilluartuunissamik suliniutini innuttaasut qanoq akuutinneqarnissaanut innuttaasunik ataatsimiititsinissaq kommunip suliniutaasa aappassarivaat. Sisimiuni ”bussi oqalliffik” pingasunngornermi novembarip 28-ani illoqarfimmi kaaviiaarpoq, tassanilu iusmaginninnermut tunngasuni suliniutit innuttaasunut ilisaritinneqarlutik. Tassani isumaginninnermi akisussaanermik annertunerusumik qanoq ataatsimoorfeqarsinnaanitsinnut siunnersuutinik amerlasuunik apeqquteqarluni akissutissanik 80-it missaaniittunik kommuni utertiffigineqarpoq.
Paasissutissat annertunerusut
Innuttaasunik ataatsimiititsinissaq pillugu paasissutissat annertunerusut pillugit attavigiuk Jacob Lundgaard, oqarasuaat 52 57 80.
Innuttaasunut ataatsimiisitsinermi malitassaq takuuk.