Kommunalbestyrelsip 2014-imut missingersuusiat oktoberimi ataatsimiinnermini
akuerivai. Qeqqata Kommunia 2014-imi 8,3 mio. koruuninik ingerlatsinikkut
sinneqartooruteqassasoq naatsorsuutigineqarpoq. Tassanngaanniit 8,4 mio.
koruunit nammineq najukkanut attartortitanut (killiffiit nikeraatit
annertussusii) tunngasut ilanngaatigineqassapput, missingersuutit takuuk.
Naak killiffiit nikeraatit annertussusii ilanngaatigineqareernerisa kingorna
ukiumi aggersussami Qeqqata Kommunia natsorsuutitigut 209.000 koruuninik
amigartooruteqarnissaq missingersuutigineqaraluartoq kommuni
aningaasaqarniarnikkut suli ajunngitsumik ingerlatsissaaq.
Borgmesteri Hermann Berthelsen naapertorlugu:
Siusinnerusukkut
kommunalbestyrelsiunikup killiffigisimasaanit Qeqqani kommunalbestyrelsi nutaaq
ingerlaqqippoq. 2014-imut najoqqutarisassat tassaassapput sukannersumik
aningaasaqarnikkut aqutsineq aammalu 2020-mi atuilluartuunissaq. Ukiup affaani
siullermi Kommunalbestyrelsi ilassutitut aningaasaliissuteqanngilaq,
taarsiulluguli akisussaassuseqarnikuuvoq sukannersumillu aningaasaqarnikkut
aqutsinissap pisariaqassusia qitiutinnikuullugu.
Taamatut pingaarnersiuinerup kinguneraa kommunalbestyrelsip Namminersorlutik Oqartussat peqatigalugit illoqarfinni marlunni innarluutilinnut utoqqarnullu inissialiortitsinissaminut maannakkut periarfissanik ammaassineq, innutaasunut taakkunannga nuannaarutigineqartussanik. Taassuma saniatigut kommunalbestyrelsip aalajangerpaa 2014-imi 2015-imilu nunaqarfinni Illorput 2100"-nik arfinilinnik sanaartortitsiniarluni, kiisalu ukiuni aggersussani Atammimmi meeqqerivissamik sanaartortitsiniarluni.
Atuilluartuunikkut ineriartortitsinissaq qitiutinneqarnikuuvoq, IPad-inik suliniutip naammassineqarneranik meeqqat atuarfiinilu atuarfimmi siunnersorteqalernermik kinguneqartumik. 2014-imi avatangiisit salliutinneqarnerpaajussapput. Taamaammat Maniitsumi sinerissamilu nunaqarfinni savimernginut eqqakkanut katersuunnikunut piiaanissamutaningaasaliisoqarnikuulluni. Sisimiuni uuliakunut ikuallaavik sanaartorneqassaaq, ima paasillugu, uuliakut annertuut avatangiisinut aningaasaqarnikkullu imminut illersorsinnaasumik atorneqartalissasut.
Sisimiuni nipilersornermik ilinniarfimmiit misilittakkat pitsaasut Maniitsumut ingerlateqqinneqarnissaat kissaatiginarpoq, tassami kommunimi atuilluartuunikkut ineriartortitsinermi eqeersimaartumik sunngiffeqarnissaq ilaalluinnarmat - inuusuttunuttaaq. Kommunalbestyrelsi kommunalbestyrelsip inuusuttassaanik aningaasanik immikkoortitsinikuummat, periarfissaq taanna akisussaaffimmik pingaartitsinermik, tamat oqartussaaqataanerannillu ilinniartitsinermik ilaqartittussanngorlugu ujartorneqarpoq. Matumuuna kommunip inuusuttortai sunniinissaminnut ukiuni aggersussanilu kommunip ineriartortinneqarnissaanut toqqaannartumik periarfissinneqassapput. Tamanna qilanaarutigaarput.
Kommunalbestyrelsi nutaaq ukiumut pissanganartumut, kommunimilu innuttaasunut nuannaarutigineqarsinnaasumik nutaanik suliassaqarfiulluartussamut qilanaarpoq.
Hermann Berthelsen
Borgmesteri
BILAG:
Aajuk 2014-imut missingersuutitigut takussutissiaq