Sisimiuni nutaamik inuusuttunut ornittagaliornissamik pilersaarutit piffissap sivisuup ingerlanerani suliarineqarput, maannali piviusunngornialerpoq. Sisimiuni inuusuttut ornittagassaannut namminersortunit ingerlanneqartussamut inuusuttut 16-init 25 tikillugit ukiullit, 2015-imi aggustip aallaqqaataani tikilluaqqussavai.
Ejendomsselskabet Sisimiut Ungdomshus ApS-imut inuutissarsiorfimmik attartortitsinissaminik Qeqqata Kommunia isumaqatigiissusiorpoq, Igloo Mountain ApS-imullu ingerlatsinissamik isumaqatigiissusiorluni. Isumaqatigiissutit taakku marluk 2015-imi aggustip aallaqqaataani atuutilissapput.
Ejendomsselskabet Sisimiut Ungdomshus-imi pisortaaneq, Igloo Mountain-imilu siulersuisunut siulittaasoq Laarseeraq Skifte oqaluttuarpoq: ”Pilersaarutit siullermik Qeqqata Kommunalbestyrelsianut saqqummiunneqarput. Pingaarnertut pilersaarummut akuersereernerisigut, inuusuttut ornittagassaata inissinneqarnissaa, ornittakkamilu suut atugassarititaassanersut pillugit ukiup aappaata affaata matuma siorna inuusuttut pilersaarummut akulerutsinneqarlutik. Aningaasaliissutissat kiisami inissipput. Suliaq sivisuumik pissanganartumillu ingerlavoq”.
Borgmester Hermann Berthelsen assigiinngitsunik tunngaveqarluni pilersaarut nuannaarutigaa: ”Inuusuttut amerlanerusunik sammisassaqartinneqarnissaannut, kommunillu suliassaataasa namminersortunngorsarneqarnissaannut atatillugu ilaatigut innuttaasut/inuusuttut peqataatinneqarnissaat Qeqqata Kommuniata pingaartippaa. Pilersaarutitigut matumuunakkut anguniakkat taakku marluk kattunneqarput. Qeqqatarmiuusunut atuilluarluni ineriartortitsineruvoq”.
Suliffeqarfiup ukiuunerani timersuutinik takornarialerinikkullu ingerlatsinerminni siunissami inuusuttut ornittagassaannut akulerussisalernissamini, assigiinngitsutigut sunniivigeqatigiinnissat Laarseeraq Skifte-p takusinnaavai. ”Inuusuttunit isumassarsisinneqartarnissarput pingaarnerpaavoq, neriussaagullu uagut aamma arlaatigut utertitsivigisarsinnaassallutigit”.
Inuusuttut ornittagassaasa Sisimiuni Nalunnguarfiup eqqaani inissinneqarnissaa pillugu inuusuttut Igloo Mountain-ikkullu isumaqatigiissinnaasimanerat Hermann Berthelsen-ip nuannaarutigaa. ”Taamaalilluni illoqarfimmi meeqqat atuarfiisa, illoqarfimmi ilinniarfissuup Teknikimit Ilinniarfiup, Nalunnguarfimmilu illoqarfimmilu sunngiffimmi neqerooruterpassuarnut inuusuttut ornittagassaat, suli pinngortitamut tikikkuminartitsilluni ungasinngisaaniissaaq. Tamanna Sisimiuni inuusuttunut annertuumik nutaamik periarfissaqalersitsissaaq”.
Maannakkut kommunip inuusuttunut ornittagaataa Nutaraq, Sisimiut illoqarfiata avataaniilluni inuutissarsiorfimmiippoq. Illuut siunissami qanoq pineqassanersoq suli aalajangerneqanngilaq, kingusinnerusukkulli akisunerpaamik neqerooruteqartunut tunineqarnissaanik kommuni pilersaaruteqarpoq.
Assit:
- Saavaniit avannamut avannamut kangimut
- Saneraaniit kujammut kimmut
- Inissisimaffia