Arjeplog Test Management 2014-ip ukiaani Kangerlussuup eqqaani biilinut misileraavissaanut, Qeqqata Kommuniata 2014-imi juunip 17-iani nunaminertamik atugassippaa.
Arjeplog Test Manegement, biililiortarfissuit soorlu BMW-kkut kiffartuullugit biilit nutaat tuniniarneqannginnerini issittumi misilerartarlugit, Sverigep avannaani Kina-milu biilinut misileraaveqarput. Apummi sikumilu ingerlasinnaassusii misilerartarpaat, soorluttaaq Kangerlussuup issileruttornerani biilit elektronikkii issimit qanoq sunnertittarnersut misilerartaraat.
Sermersuup qanitarisaani nunaviup silaannaani allanngujuitsumi, mittarfimmi takisuumi aqqusinernilu takisuuni piffissami sivisuumi misileraasinnaanissaq, Kangerlussuarmi biilinik misileraanissami iluaqutitaraa. Ataavartumik misileraavissamik pilersitsinissap anguniarneqarnissaani tunngavissiisussaalluni misileraanerit 2014-imi aallartinneqarpata, Kangerlussuarmi atugassarititaasut naatsorsuutinut naammassinnissinnaanersut misiligarneqassapput.
2014-imi oktobarip qeqqata missaanit novembarip qeqqata missaanut naatsorsuutigisamik misileraanissami qularnanngitsumik suliffiit 20-30-t pilersinneqassapput. Misileraavinnissaq sioqqullugu Arjeplog Test Management ikitsuinnarnik sulisoqarluni misileraanissaq piareersassavaat, soorluttaaq misileraanissaq sioqqullugu kingornalu paasissutissanik katersisoqarumaartoq. Siunissami ataavartumik misileraaveqalissappat, misileraanerup nalaani Kangerlussuarmi suliffissat 200-250-inik amerlissapput.
1999-imit 2005 tikillugu Sermersuarmi 120 km-inik takitigisumik misileraaveqarnikuummat, Kangerlussuaq siornatigut biilinut misileraaviunikuuvoq. Biilinut misileraavissaq nutaaq Sermersuarmiissanngilaq, misileraanerillu aqqusinerni piusuni, tatsini Kangerlussuullu qanitarisaani nunami ingerlanneqartassallutik. Biilinut misileraavissaq massakkut Kangerlussuarmut qaninnerusussaammat, matumani Kangerlussuarmut sunniuteqassasoq kommunip naatsorsuutigivaa.
Nunap assinga ilanngunneqartoq naapertorlugu Akuliarusiarsuup kuuata ilaani, Aajuitsup Tasiata kangiatungaani, Lake Helen-imi, Akuliarusiarsuup kuuatalu kitaatungaani tatsimi, ATM nunaminertamik atugassinneqarpoq.
Nunap assinga uani takuuk.