2016-imi Sullualukkut umiarsuaq takornariartaat siulleq angalassasoq pillugu ”nutaarsiassamut” borgmesterip Hermann Berthelsenip nunaqarfinnilu aqutsisuni siulittaasup Knud Olsenip tupigusuutigaat. Ippassaq 2014-imi juulip 22-ni kalaallit tusagassiortoqarfianit nutaarsiassatut saqqummiunneqartoq.
Sullualukkut umiarsuit takornariartaatit aasaq manna arlaqartut Kangerlussuaq aallaavigalugu imaluunniit tikiffissatut angallatilereerput. Umiarsuit takornariartaatsit Silver Explorer aammalu L’Austral angalasarput, ukiunilu tulliuttuni allat angalasussaallutik. Ukioq kingulleq ilaatigut Hanseatic Sullualukkut angalavoq.
Umiarsuit Kangerlussuaq aallaavittut imaluunniit tikiffissatut angalatillutik, Kalaallit Nunaannut immikkut soqutiginaateqarpoq, tullinnguuttutigummi kinguneqartarpoq:
- Air Greenland-imut timmisartuutileqatigiinnullu allanut ilaasoqartarpoq
- Mittarfeqarfiit nunattalu karsianut timmisartornermut akileraarutinik isertitaqarneq
- Nunatta karsianut umiarsuit takornariartaatinit akileraarutinik isertitaqarneq
- Minnerunngitsumillu illoqarfinni nunaqarfinnilu arlaqartuni takornarialerisunut isertitatigut kaaviiaartitsineq
Borgmesterip Hermann Berthelsenip nunaqarfinnilu aqutsisut siulittaasuata Knud Olsenip paasissutissiissutigaat, Kalaallit Nunaanni umiarsuit takornariartaatit ilaasunik paarlaatsitsinerit Kangerlussuarmi taamaallaat ingerlanneqartartoq immaqalumi aamma Narsarsuarmi. Umiarsuarni takornariartaatinit ilaasut hundredikkuutaat ikinissaannut niunissaannullu, umiarsuarnik takornariartaatillit mittarfinni timmisartut anginerusut missinnaanissaat aallaavigisarnerat patsisaavoq. Nunarsuarmilu Kangerlussuarmi mittarfeqarfiani akuttoqatigiinnik ingerlatsisartuni annersaat ilagaat.
2016-imi umiarsuarnik takornariartaatilik Crystal Cruises, umiarsuit allat assigalugit Kangerlussuarmi ilaasunik paarlaatsitsinani, New York-imit Anchorage-mut angalanissaa Borgmesterimit nunaqarfinnilu aqutsisuni siulittaasumit ajuusaarutigineqarpoq. Ullumikkulli Kangerlussuarmi umiarsualiveqarnermut pissutsit patsisaallutik, umiarsuit takornariartaatinit annerusunit, soorlu Crystal Cruises-ip 2016-imi atugassaatut annertutigisunit ilaasunik paarlaatsitsiniarnissaq ajornakusoorpoq.
Kangerlussuarmi umiarsualivimmi pissutsit piaartumik pitsanngorsarneqanngippata, taava umiarsuit takornariartaatit nunanut allanut angalasalernissaat Kalaallit Nuaannit isigiinnarneqarsinnaavoq. Kangerlussuarmi nutaamik umiarsualiviliortoqarnissaq piaartumik Aningaasaqarnermut inatsimmut ilanngunneqartariaqarpoq, taamaaliornikkullu takornarialerineq siumut ingerlalerlunilu ineriartortinneqassaaq, taamatut Hermann Berthelsen Knud Olsenilu naggasiipput.
Kangerlussuarmi puttasut
Kangerlussuarmi umiarsualivik
L’AUSTRAL
http://en.ponant.com/Cruises/All-our-cruises/Northwest-Passage
SILVER EXPLORER
http://www.silversea.com/expeditions/destinations/plan-expedition/?voyage=7418&year=2014
CRYSTAL SERENITY
http://www.crystalcruises.com/northwest-passage-cruise/northwest-passage--6319