2014-imi septembarip 25-ani Qeqqata kommunalbestyrelsip ataatsimiinnermini, Kangerlussuarmi nutaamik umiarsualivittaarnissamik suliniuteqartoqassasoq akuersissutigaa. Kalaallit Nunaanni inuiaqatigiinni inuussutissarsiutitigut ineriartortitsinissamut aningaasaliissuteqarnissaq pitsaanerpaasoq pillugu borgmester Hermann Berthelsen, Aatsitassanut attaveqaqatigiinnermullu ataatsimiititaliami siulittaasoq Gedion Lyberth kiisalu Nunaqarfimmi aqutsisuni siulittaasoq Knud Olsen peqatigalugit paasissutissiivoq. Taamaallaat 33 mio. koruuninik aningaasaliineq ukiut pingasut-sisamat ingerlanerinnaani utertinneqarsinnaasut.
Kangerlussuarmi umiarsualivik nutaaq pisariaqarluinnarpoq, umiarsualivimmi piusoq taamaallaat 2 meterinik itissuseqarpoq. Tamanna tunngavigalugu umiarsuit pajuttaatit umiarsuillu takornariartaatit umiarsualiviup avataatungaani kisartariaqartarput, umiaasaaqqanillu umiatsianillu nassiussanik ilaasunillu ikaassuisoqartariaqartarluni, Kangerlussuarmi Nunaqarfimmi aqutsisuni siulittaasoq Knud Olsen oqaluttuarpoq.
Umiarsualivimmi pissutsit pitsaasuunngilluinnaraluartut, umiarsuit takornariartaatit minnerusut Kangerlussuarmi ilaasunik paarlaatitsisassallutik toqqarsimavat, umiarsuilli takornariartaatit anginerusut nunani eqqaamiuusuni ilaasunik paarlaatitsisarlutik, tamatumalu kinguneraa Kalaallit Nunaanni mittarfeqarfinnut akitsuutinik isertitassanik kaaviiaartitassanillu annaasaqarneq. Nutaamik umiarsualivimmik pilersitsinermi umiarsuit amerlanerit anginerillu nunanut eqqaamiunuunngitsoq Kalaallit Nunaanni ilaasunik paarlaatitsisalernissaat periarfissaalissaaq, Gedion Lyberth erseqqissaavoq.
Rambøll-ip ARTEK suleqatigalugu umiarsualivimmik pilersitsinissamut periarfissanik misissuisimavoq. Misissuinerup kingunerisaanik umiarsualivimmit pioreersumit 10 km-it missaanik ungasinnerusumi pilersitsisoqarsinnaanera paasineqarpoq, inissiivissatullu periarfissaasinnaasumi tininnerpaaffiani 10 meterimik itissuseqarpoq, umiarsualivillu umiarsuarnik 230 m-it missaat angullugit takissusillit tigusisinnaalluni, tassa umiarsuit ilisimaneqartut Kalaallit Nunaata kitaani avannaanilu angalasartut angalanissaminillu eqqarsaateqartut takeqqataat. Umiarsualivittaata sanaartorneqarnissaanut 23,4 mio. koruunit aningaasartuutigineqassasut naatsorsuutigineqarpoq.
Umiarsualiviup tungaanut aqqusinniortoqassaaq, umiarsualivimmilu inissiivissanik kiisalu nassiussanik ilaasunillu sullissinissamut atortuutinik pilersitsinissamut periarfissaqarluarpoq. Aqqusinniorneq 9,8 mio. koruuninik aningaasartuuteqarfiussasoq naatsorsuutigineqarpoq. Sanaartornermut tamarmut aningaasartuutissat 33,2 mio. koruuniussapput. Siunissamut ungasinnerusumut nassiussanut inissiivissamut sanaartornissamut 7 mio. koruuninik aningaasaliisoqarsinnaasoq teknikkikkut ilisimatuut naatsorsorpaat.
Toqqaannartumik ilanngaatissat ilanngaatigereerlugit sipaarutissat pitsanngorsaanerillu ukiumut 3,5 mio. koruuniussapput, umiarsuillu takornariartaatit amerlanerit Kangerlussuarmi ilaasunik paarlaatitsisalernerisigut, Kalaallit Nunaannut angalasalersut amerlisinneratigut, inuiaqatigiinni aningaasaqarnikkut iluanaarutissat ukiumut 7,6 mio. koruuniunissaat naatsorsuutigineqarpoq.
Borgmester Hermann Berthelsen-ip qularutiginngilluinnarpaa, nunatsinni
timmisartoqarfik nunanit allanit tikinneqartartoq pitsaanerusumik
umiarsualiveqarnissaa, Kalaallit Nunaanni inuiaqatigiinnit tamanit
silassorissutut isigineqassasoq, pilersitsinermimi umiarsuit takornariartaatit
Kalaallit nunaata sinneranut takornarissanik angallassilluarnerulersinnaapput.
Kalaallit Nunaanni takornariaqarnerup ineriartortinneqarnissaa siusinnerusukkut
ingerlanneqaruni pitsaaneruvoq, borgmesteri naggasiivoq.