Sisimiuni, Maniitsumi, Kangerlussuarmi Kangaamiunilu meeqqat atuarfiini pisortat ukiup affaata tulliuttup ingerlanerani, pisortat ineriartortinneqarnissaat immikkut sammissavaat. Malugalugu, namminneq immikkut sammissavaat!
Ippassaq Michael Binzer-ip aqutaanik Sisimiuni pisortat ineriartortinneqarnissaat pillugu iluatsitsiviusumik saqqummersitsinermi taama aalajangiisoqarpoq. Saqqummersitsineq naggaserlugu, ukiup affaata tulliuttup ingerlanerani pisortat ineriartortinneqarnissaat immikkut sammineqarnissaa pillugu atuarfinni pisortat aamma Michael assammillutik isumaqatigiissuteqarfigaat.
Michael Binzer-ip nammineq ingerlanneqartuni inuutissarsiorfinni misilittakkani, saqqummersitsinikkut pisortanut aallarniutigalugu oqaluttuarai. ’Ilinniartitaaneq’ pissarsinaqaaq, matumanimi nammineq ingerlanneqartuni inuutissarsiorfinni aqutsisuuneq, meeqqat atuarfiinilu aqutsisuuneq assigiilluinnartut paasinarsivoq. Aqutsineq takussaasoq ersarissorlu kiisalu pimoorussineq kajumissuseqarnerlu allannguinissamut aqqutissaapput.
2015-imi Qeqqata Kommuniani arlaleriarluni saqqummersitsinermigut, Michael Binzer atuarfinni pisortanut suli sakkussanik tunioraaniarpoq. Saqqummersitsinerit akorngini atuarfinni pisortat suliassaqartinneqartassapput, saqqummersitsinerimmi akorngini immikkut sammisat suliarineqartartussaapput, taamaalilluni pisortat suleriaasissaat meeqqat atuarfiini atuutsinneqalerniassammata.
Kommunip meeqqat atuarfiinik ineriartortitsiniarnerata tigulluarneqarnera, Borgmester Hermann Berthelsen-ip nuannaarutigaa. Atuarfinni siunnersortinik atorfinitsitsisimaneq, atuartitsinermilu iPads-inik atuilersitsineq maanna atuarfinni pisortanik immikkut samminninnermik malitseqartinneqarpoq. ”Meeqqat atuarfia ineriartortiSSAVARPUT. Nunatta siunissaraa. Nunami politikerit, qitiusumillu ingerlatsiviit aamma tapersiissapput”, taama Hermann Berthelsen erseqqissaavoq.
Meeqqat atuarfiat politikerinit aamma eqqartorneqassasoq imaluunniit allatut oqaatigalugu massakkut qineqqusaarnermi ilanngunneqassasoq kissaatigalugu, atuarfinni pisortat saqqummersitsinermi aamma oqaatigaat.
Assiliisoq Nivi H.
Efraimsen