Imarpik qulaallugu timmisartuussinernut Nuummi mittarfeqalissappat takornarialerineq eqqorneqangaatsiassaaq

Imarpik qulaallugu timmisartuussinernut Nuummii mittarfeqalernissaa arlalinnit isumaqataaffigineqarpoq, taamaattoqassappalli Kalaallit Nunaanni takornarialerinermut eqquingaatsiassaaq. 2014-imi avataaniit tikeraat unnuisarfinnik atuinerini, taakkunannga 18 procentit Sermersooq-Kitaaniissimapput. Juuli kisiat qiviassagutsigut, 2014-imi juulip qaammataani avataaniit tikeraat unnuisarfinnik atuinerini Sermersooq-Kitaa 7 procentiinnarnik unnuiffigineqarsimavoq.

Eqitsit 1: Nunatta Naatsorsueqqissaartarfia naapertorlugu 2014-imi avataaniit tikeraat unnuisarfinni unnuisimasut 

	Katillugit	Procentinngorlugu katillugit	Juuli	Procentinngorlugu juuli
Qaasuitsup	12.730	35%	3.924	43%
Qeqqata	9.535	26%	1.866	21%
Kujalleq	3.076	9%	1.091	12%
Sermersooq–kitaa	6.475	18%	646	7%
Sermersooq–kangia	4.218	12%	1.571	17%
katillugit	36.034	100%	9.098	100%

Juulip qaammataani avataaniit tikeraat unnuisarfinni unnuisimasut taamaallaat 7 procentii, ukiumulli tamarmiusumut 18 procentii Sermersooq-kitaani Nuuk illoqarfiit annersaralugu unnuiffigineqarsimatillugu, Nuummi tikeraat unnuisarfinni unnuisimasut soorunalimi pingaarnertut Namminersorlutik Oqartussat pulaarsimassavaat. Tikeraat taakku angalanerat, Nuummilu unnuisarfinni unnuisimanerat qularnanngitsumik Namminersorlutik Oqartussanit akilerneqartarsimassaaq. Juulip qaammataani Namminersorlutik Oqartussani atorfillit sulinngiffeqarnerini, avataaniit siunnersortit tikeraagassaqaratillu Nuummut angalanissaminnut akiliisussaqanngillat. Taava nunap sinnerani unnuisarfiit assigalugit Nuummi unnuisarfiit ’takornariavinnik’ pilerisaarisariaqartarput, tamatumunngalu pikkorippallaanngillat. Unnuisarfinni unnuisimasut 7 procentiinnai unnuisorisimavaat, tamannalu nunap immikkoortortaanni tallimaasuni annikinnerpaatut inissisimallutik.

Tamanna Nuummi unnuisarfiit pisuussutiginnginnguatsianngilaat, takornarialli angalanerminnik namminneq akiliuteqartussaatillutik Nuuk qalipaatigissaaqisoq tikillugu pisiniarfissuarni café-ni kaffisorusaarnissartik orniginartinnavianngilaat. Sermersuaq, Kalaallit Nunaata pinngortitaa kusanaqisoq, Kalaallit Nunaannilu illoqarfiit nunaqarfiillu kalaalerpaluttut misigerusuppaat. Avataaniit takornarissat Kalaallit Nunaanni nunat immikkoortortaannut allanut, soorunalimi pingaartumik Ilulissanut Kangianullu takornariartarput.

Qeqqata Kommuniani pingaartumik Kangerlussuarmi, tassanngaanniit pisullutik, sikkilerlutik angallatinilluunniit Sermersuarmukarsinnaasartunik aamma takornariarpassuaqartarpugut. Taamaattorli takornarissat aamma Maniitsumukarlutik, qulimiguulimmik Maniitsup sermianut qanitarisaanilu qaqqarsuarnut majuutseriarlutik sisorariartarput. Kommunitsinni takornariaqarneq suliniuteerarpassuartigut soorlu Sermersuaq pinngortitarlu tikikkuminarsarlugit Kangerlussuup Sisimiullu akornanni kiisalu Tasiusaq-mit Apussuarnut ATV-nut aqqusiornikkut ineriartortinneqassaaq. Umiarsuit takornariartaatit tikittartut amerlisinniarlugit, talittarfiit aamma ineriartortinneqartariaqarput. Sisimiuni talittarfimmik alliliinerup takutippaa, talittarfinnik ineriartortitsineq takornarialerinikkut ineriartuutaasoq.

Nuuk/Sermersooq-Kitaa aamma Ilulissat/Qaasuitsoq, aasaanerani timmisartuussisarfinnut Kangerlussuarmut Island-imullu assigiimmik ungasissuseqartut maluginianngitsoorneqarsinnaanngilaq. Avataaniit tikillugit unnuisarfinni unnuisartut 43 procentii avannamukarlutik Ilulissiartarput/Qaasuitsumukartarput, illuatungaanilu 7 procentiinnaat Nuummukartarlutik/Sermersooq-Kitaanukartarlutik. Allatut oqaatigalugu Nuummut takornariartoqarneq ajorpoq.

Imarpik qulaallugu timmisartuussinernut Kangerlussuarmi Mittarfiujunnaarluni, Nuummi nutaamik mittarfiliortoqaraluarpat Kalaallit Nunaanni takornarialerinermut annertoorujussuarmik kingunerlutsitsisussaavoq. Imarpik qulaallugu timmisartuussinermut Kalaallit Nunaanni mittarfik Nuummut nuunneqaraluarpat, avannamullu angalaniartilluni Nuuk aqqusaarneqaqqaartalissappat, avataaniit takornarissat Ilulissanut Kangerlussuarmullu takornariarniat sivisunerusumik akisunerusumillu angalasalissapput. Naak, sivisunerusumik akisunerusumillu angalanissaq eqqarsaatiginagu takornariamininnguit naatsorsuutigisatik uniorlugit Kalaallit Nunaata annersaa timmisartumiit takusalissavaat. Qularnanngitsumik aalavallaannginnissartik kissaatigalugu siullermik Nuuk qulaavaaqqaassavaat, missinnaannginnertillu pillugu aqaguani misileeqqinnissaminnut Island-imut Amerikap Avannaanulluunniit timmisartuunneqaqqissapput. Keflavik-ip mittarfiani ’Nuuk new info’ ullorpassuarni atuaruusaarlugu, takornarissat Kalaallit Nunaanni angalasimanerminni nuannersumik misigissalikkersaarnaviarunnanngillat.

Suna tamaat Nuummiisillugu suna tamaat annersaatinnagu, Kalaallit Nunaata sinnera eqqornagu, uagutsituulli Nuummi takornariaqarneq inuutissarsiutitigullu periarfissat ineriartortinneqartariaqarput. Ilulissani taamaappoq. Qeqqata Kommuniani taamaappoq. Soormi taava Nuummi taamaassinnaanngillat?