Sisimiut Kangerlussuullu akornani ATV-nut aqqut. Pisuussutinut uumassusilinnut atuilluarnissamut aqqutissaq.

Pisuussutit uumassusillit maannamit atorluarnerusinnaavagut. Qeqqata Kommuniani pisuussutit uumassusillit pillugit suliniutit pitsaasut arlaqartut qujanartumik ingerlanneqalereerput. Piniartortagut nioqqutissanik nutaanik, soorlu qeqqussanik panertitanik misileraallutillu saarullinnik misiligummik panertitseqqittalerput. Piniagassat nutaat, soorlu avaleraasartuut imartatsinnut takkussuutilerput. Aalisakkerivigut saarullinnut `uumatitsivinnik` misileraaleruttorput. Niuertafinni nerisassat nutaat, soorlu pizza umimmaap neqaanik akuugaq, umimmammillu pølsit nioqqutigineqartalernikuupput, taamatullu neriniartarfiit kalaallit nerisassaataannik sassaalliinissaminnut pikkorissigaluttuinnarlutik.

Ineriartorneq ajunngitsumik ingerlavoq, taamaattorli pisuussutit uumassusillit atorluarnerusariaqarpagut, pingaartumik uumasut nunamiutat. Umiatsiaaqqanik, aalisariutinik kilisaatinillu imaaliallaannaq avalassinnaalluta, ukioq naallugu nunamut tulassinnaneq ajornarnerusinnaasarpoq. Ukiuunerani qimussit qamuteralaallu ilummukaatigineqarsinnaasarput, aasakkulli ajornarnerusarluni. Sisimiut Kangerlussuullu akornani ATV-nut aqquteqalerneratigut, kingornalu aqqutivimmik aqquteqalerneratigut nuna atorluarnerulersinnaassavarput. Taamaalilluta nunap timaani pisuussutit atorluarnerulersinnaavagut. Nunap atorluarnerunissaa eqqarsaatigalugu, umimmaateqarfinnik tuttuuteqarfinnillu pilersitsisinnaavugut. Taamaattorli ATV-nut aqquteqalernikkut, naasut paarnallu atorluarneqarsinnaalissapput.

Sisimiut Kangerlussuullu akornani ATV-nut aqquteqalernikkut, Sisimiut Kangerlussuullu akornanni akikinnerusumik assartuisoqarsinnaalissaaq. Assersuutigalugu Kangerlussuarmi neriniartarfinnut kapisilinnik tunisisarnikuuvunga, kisiannili kapisillit Sisimiuniit Kangerlussuarmut timmiasartumik nassiunnerinut kilomut 20 koruuninik akiliisariaqartarnikuullunga. Soorunami neriniartarfinnut, kapisilinnik pitsaasunik amerlanerusunik perusukkaluartunut, tamanna akitsorsaataasarpoq. Aappaattut, umimmannik neqaarniartut sinerissamut nioqqutissiorusukkaluartut ilisimavara. Taamatuttaaq ATV-nut aqqut atorlugu aalisakkanik nutaanik Sisimiuniit Kangerlussuarmut assartuisitseriarluta, nunanut allanut timmisartumik assartuisitsisalernissarput neriunarpoq. Sisimiut aamma Kangerlussuup akornanni ATV-nut aqquteqalernikkut, Atlantikorlu qulaallugu timmisartuussisarnernut Kangerlussuarmi mittarfik isumannaaqisoq atorlugit, nunatta pisuussutaanik atuilluarneruniarnerput aatsaat taamak iluatsilluassagaluarpoq.