Amerikkarmioq takisooq, qallunaarlu mikisoq 100 meterinik arpallutik oqilaniukkaangata, amerikkarmioq niukkaanerugami ajugaakkajunnerusarpoq. OL-imi VM-imilu 100 meterinik arpalluni oqilaniunnermi, Danmark-i ajugaanikuunngitsoq, USA arlalissuarnik medaljiannannikuuvoq.
Tamanna soorunalimi qallunaamut mikisumut qinngarnassaqaaq, taamaattumillu amerikkarmiutuulli niukkaarusukkaluarnera paasilluarneqarsinnaalluni. Qallunaaq taamak niukkaatiginissaminik takorluugaqarnermini, 100 meterinik arpalluni oqilaniunnermi takorluukkamini ajugaasinnaassajunnarsivoq.
Atlantikoq qulaallugu timmisartuussisarnernut Nuummi mittarfeqalernissaanik Lars Lund-ip takorluugaqarnera taamatorluinnaq ippoq. Assartuussineq pillugu Isumalioqatigiissitap Lars Lund-illu, ”Nuuk minnerpaamik 1800 meterinik mittarfeqarluni” Kalaallit Nunaannut isaariaanissaanik isummernerat silatusaarneroratarsinnaavoq, takuuk sapaatip akunnera 44-mi Sermitsiaq-p saqqummernera. Tamannali takorluukkanik tunngaveqarpoq.
Lars Lund-ip takorloorpaa, atlantikoq qulaallugu timmisartuussisarnernut Nuummi mittarfeqalernikkut, atlantikoq qulaallugu timmisartuussisarnernut Kangerlussuarmi mittarfeqarnermut sanilliullugu ”Ilulissanut timminissaq akunnerup affaanik sivitsussasoq”. Aap, Nuummi silagitsillugu taamaassinnaassajunnarsivoq, Nuummili taamak silarluttartillugu, silarlunnera pillugu atlantikoq qulaallugu timmisartoq utiinnartariaqartillugu, Islandimulluunniit mittariaqartillugu, Ilulissiarneq ullormik ataatsimik arlalinnilluunniit sivitsussaaq.
Qularnanngilaq Lars Lund-ip Islandimiinnissani ajoriffissaqartissanngikkaa, qanorluunniimmi silamik patsiseqartumik Islandimiit ingerlaqqissinnaanngikkaluaruniluunniit, angalanera Kalaallit Nunaanni pisortat akilertarpaat. Illuatungaani takornariaq Ilulissiarniarluni Islandimi utaqqinerminut Namminersorlutik Oqartussanit akiliunneqarnavianngilaq. Ilulissani Kalaallit Nunaannilu takusassarsiorlutik angalanissartik, Lars Lund-ip takorluugaanit tavanneqaannassaaq.
Palasip norskiusup kalaallinik kristumiunngortitsiniarnermini, Godthåb-ip anorsarittarnera tingerlaatinut iluaqutaanera pillugu Godthåb-imik tunngaviliineranit ukiorpassuit qaangiutereersut eqqarsaatigalugu, amerikkarmiut mittarfinnik sanaartornissamik ilisimatuut, nunarsuarmi eqqissinissamik sorsuuteqarlutik Kangerlussuarmi mittarfiliorsimanerisa iluaqutissartaanik Naalakkersuisut takunnissinnaassasut neriuppugut.
Qularinngilluinnarparput, amerikkarmioq takisooq medaljiarpassuarnik suli pissarsisarumaarmat, Kalaallit Nunaannilu qallunaaq mikisoq kisiat pinnagu, nunarsuarmi pitsaanerpaanik atuinissatsinnut piffissanngunnginnerluni. Mittarfiillu pineqartillugit, Kangerlussuarmi amerikkarmioq takisooq 2,8 km-eq pitsaanerpaavoq.