1. Qeqqata kommunalbestyrelsiata piumasaraa, Kangerlussuarmi mittarfiup nutarterneqarnissaata pisariaqassusaanik misissuinermi tunngavinnik Naalakkersuisut saqqummiussissasut
2. Qeqqata kommunalbestyrelsiata piumasaraa, Kangerlussuarmi mittarfiup nutarterneqarnissaata pisariaqassusaa pillugu kina paasissutissanik suliaqarlunilu, kina pitsaassutsikkut qulakkeerisimanersoq pillugu Naalakkersuisut saqqummiussissasut.
3. Qeqqata kommunalbestyrelsiata piumasaraa, Kangerlussuup siunissaa pillugu pilersaarutitik pillugit Naalakkersuisut Kangerlussuarmi innuttaasunik ataatsimiisitsissasut.
Kangerlussuarmi Mittarfik pillugu Naalakkersuisut, Naalakkersuisuni atorfillit Mittarfeqarfiillu allakkioriarlutik, misissuinermi tunngaviit tamanut saqqummiunnagit, atortussanik kina suliarinnittuusimanersoq, tunngavinnillu kina pitsaassutsikkut qulakkeerisimanersoq paasissutissiigatik, pissutsillu tamakku pillugit innuttaasunik ataatsimiisitsinatik, tamatuminnga tusagassiutitigut nalunaaruteqarnerat Qeqqata kommunalbestyrelsiata akuersaarsinnaanngilluinnarpaa.
A. Qeqqata kommunalbestyrelsiata Naalakkersuisut kajumissaarpaat, silaannakkut angallassineq pillugu pilersaarummik saqqummiissasut, taamaalilluni paasissutissiissutigineqartut tunngavigalugit Inatsisartut mittarfiit pillugit aalajangiisinnaaniassammata.
B. Qeqqata kommunalbestyrelsiata Naalakkersuisut kajumissaarpaat, nunap immikkoortortai tamarmik, taamaalillunilu aamma Qeqqata Kommuniata ineriartortinneqartussanngorlugit attaveqaqatigiinnikkut pilersaarutinik saqqummiussissasut.
C. Qeqqata kommunalbestyrelsiata Naalakkersuisut kajumissaarpaat, nunami aningaasaqarnikkut nammanneqarsinnaasumik sanaartornissami piviusorsiorpalaartunik pilersaarutinik saqqummiussissasut.
Inatsisartunut allakkiaq arfinilinnik quppernilik, Kangerlussuarmilu Mittarfiup nutarterneqarnissaata pisariaqassusaa pillugu allakkiaq marlunnik quppernilik tunuliaqutaralugit, mittarfiliortoqarnissaa pillugu pilersaarusiortitsinissamut sanaartortitsinissamullu Inatsisartut Naalakkersuisunut pisinnaatitsinera Qeqqata kommunalbestyrelsiata akuersaarsinnaanngilluinnarpaa. Tamatuma saniatigut mittarfittaassat qanoq takitigissanersut allassimanngilaq, soorluttaaq qanoq aningaasartuutigineqassanersut allassimanngitsoq.
Avammut tusarliunneqartut assigiinngitsut Qeqqata Kommuniani, pingaartumillu Kangerlussuarmi innuttaasunut aningaasaliisunullu kingunerluutissat Naalakkersuisunit eqqumaffiginiarneqarunannginnerat, Qeqqata kommunalbestyrelsiata ernumanartoqartippaa.