Namminersorlutik Oqartussat aningaasaqarnikkut aalajangiisarneratigut, kommunip aningaasaqarnera ajorsiartuinnarpoq. Ataavartumik nalimmassaatissatut siunnersuut ajoraluartumik utaqqiisaasumik ukiunut pingasunut atuukkallartussamik nalimmassaanermik taarserneqarpoq, tamatumalu kingunerisaanik Qeqqata Kommunianut isertitassat annikinnerungaatsiartussanngorlutik. Ukiut siulii assigalugit illoqarfiit pingaarnersaat salliutinneqartutut isikkoqarpoq, sanaartornernullu atatillugu kommunit sinneri pingasuusut Aningaasaqarnermut Inatsimmi tulleriissaarinermi kingullinngortinneqarlutik.
Taakkartorneqartut patsisaallutik Qeqqata Kommuniata aningaasaqarnera nalorninartumik inissisimavoq, Namminersorlutik Oqartussallu Qeqqata Kommuniani suliffeqarfinnik Nuummut nussuisitsineratigut kiisalu Nuummi suliniutit nutaat pingaarnerutinneqarnerisigut aningaasatigut inissisimanermut ajornerulersitsilluni. Sanaartornermut suliniutit Namminersorlutik Oqartussanit aningaasaliiffigeqataaffiusussat pingaartinneqarnissaat pillugu Kommunalbestyrelsi tamakkiisoq aalajangiinikuuvoq. Naalakkersuisut siammaallutik allatut periuseqarnissaminnik aalajangissagaluarpata, kommuni piareersimassaaq.
Ataatsimut akisussaaqataaffiusunut kommunimit sanaartornissamut qinnuteqaataasunut, soorlu Maniitsumi Ilaqutariinnut inerisaavik kiisalu illoqarfinni innarluutilinnut centerissanut, Namminersorlutik oqartussat akisussaaffimmik tigusillutik tapersersuinissaat Qeqqata Kommunianit utaqqimaarneqarpoq. Taamatut inissisimasoqartillugu inuutissarsiornikkut ineriartuutaasussanik ATV-nut ingerlavissiassaq/aqqusinissaq, kuuffissuarnut aningaasaliissutissat, iliveqarfinnut pisariaqartunik aningaasaliinissat kiisalu illuutinik nutarterinissaq, minnerunngitsumillu meeqqanut inuusuttunullu kiisalu utoqqarnut tunngatillugu suliniutinut nutaanut kommunip silatusaarluni suliniutaanut Namminersorlutik Oqartussat tapersersuigunik naleqqunnerussaaq.
2016-imut missingersuutini teknikkimut tunngasuni sanaartornissamut aningaasaliissutinit tigulaagaq:
- Kuuffissuarnik nutarterineq/Namminersorlutik Oqartussat
Namminersorlutik Oqartussat aningaasaleeqatigalugit kuuffissuarnik nutarterinissamut, 2016-imit 2019 tikillugu 3,5 mio. koruunit immikkoortinneqarput.
- Iliveqarfiup allilerneqarnera
Maniitsumi iliveqarfiup allilerneqarnissaanut 2016-imut 1,5 mio. koruuninik immikkoortitsisoqarpoq, soorluttaaq Kangaamiuni iliveqarfiup tungaanut aqqusinissamut 2017-imit 2019 tikillugu 1,0 mio. koruunit immikkoortinneqartut.
- ATV-aqqut
Kangerlussuup Sisimiullu akornanni kiisalu Maniitsumi Tasiusamit Apussuit tungaannut ATV-nut aqqusiornissamut 2016-imut 6,0 mio. koruuninik, 2017-imullu 12,0 mio. koruunit immikkoortinneqarput.
Qeqqata Kommuniani namminersorlutik inuutissarsiortut pitsaasumik ineriartorput, tamannalu Namminersorlutik Oqartussat kommuninik kingullinngortitsisarnerinut nalimmassaataanissaat neriuutiginarpoq. Sisimiuni Maniitsumilu aalisakkerivinnik nutaanik ammaanikkut, Hudson aatsitassanik piiaavimmik ammaaneratigut kiisalu umiarsuit takornariartaatit Qeqqata Kommunianut tikittartut amerliartornerisigut, Qeqqata Kommuniani inuutissarsiutitigut ineriartornerup pitsaasumik ingerlaneranik takussutissiivoq. Namminersorlutik Oqartussat suliffeqarfiisa nussorneqarnerisigut akileraarutitigut annaasaqaataasunut, suliniutit nutaat tamakku nalimmassaataasinnaanissaat neriuutiginarpoq.
Kommunalbestyrelsip paasinninnera naapertorlugu Namminersorlutik Oqartussat ineriartortitsinertik kukkusumik ingerlappaat, taamaaliornermikkullu Nunatta aningaasaatai siunnerfeqanngitsumik aningaasaliissutigisarlugit, soorluttaaq Nunatta siunissaanut pisariaqaraluartunik ineriartortitassanut aningaasat aningaasaliissutigineq ajorlugit. Mittarfeqarnermut periusissatut 2015-imi politikkip Naalakkersuisunit saqqummiunneqarneranut atatillugu Qeqqata Kommuniata immikkut ersersinniarnikuuvaa, Qeqqata Kommuniani pingaartumillu Kangerlussuarmi aningaasaleerusussinnaasunut, innuttaasunullu kingunerluutaasinnaasut pillugit Naalakkersuisut politikkimik saqqummiussaminni assigiinngitsutigullu nalunaaruteqartarnerminni maluginiarsimanngimmatigit ernumanartinneqartoq.
Taamaakkaluartoq ukiumut pissanganartumut kommunimi innuttaasunut iluaqutaasussanik suliassanik nutaanik ilaqartussamut kommunalbestyrelsi qilanaarpoq.