Viceborgmestererput Gideon Lyberth pisinnaanngimmat kommunerput sinnerlugu oqaaseqalaassaanga.
Maniitsup kommunitoqarigallarmaguli taamanikkut ulloq manna, februarip ulluisa aqqaneq aappaat, Maniitsup oqaluttuarisaaneranut ilanngutiinnaqaaq.
Ullormi erinigisimasarput kiisami nalliuppoq. Maniitsormiut nipilersornerup illuanik peqalerpugut. Nunanut allanut naleqqiullugu mikigaluartoq uatsinnut pingaartua sunaasoq nalunngilarput, tassa anersaakkut inuunitsinni erinarsornerup nipilersornerullu silarsuaani piginnaanngorsartuarnissamut periarfissatsialammik peqaleratta. Pilluaritsi.
Illup matuma atuuffissaa marloqiusaavoq.
Kommunalbestyrelsimit piumasarisimavarput manna ornittagaallunilu ilinniarfiussasoq – nunaqqatigiit naapittarfigalugulu nipilersornermik erinarsornermillu kajumittut sungiusartarfissaat.
Meerartavut inuusuttuarartavullu kisimik aamma eqqarsaatigineqanngillat. Illu manna Maniitsormiunut tamanut atavoq. Ullukkut meeqqat inuusuttuaqqallu atuisuusartussaapput, unnukkut inersimasut.
Illup matuma ilua aaqqissugaavoq ingerlassassanut sammisassaqartitsinissanullu assigiinngitsunut naleqqussarlugu. Taamaammat kommunalbestyrelsimit aamma piumasarisimavarput illu iseruminartuussasoq, ullumilu takusinnaasatsitut siunertaq aamma taanna eqquussimavoq.
Kommunitta mikisunnguunera eqqarsaatigalugu tulluusimaarnanngitsuunngilaq maanna marlunnik nipilersornermik ilinniarfeqalermat.
Naluneqanngitsutut Sisimiut 2006-imi pitaarput, uagullu tassa ukioq manna. Atuilluartuunissaq eqqarsaatigalugu kommunalbestyrelsimit kissaatigaarput Sisimiuni Maniitsumilu ingerlatsinikkut annertuumik suleqatigiinneqassasoq.
Minnerunngitsumillu nunani allani nipilersornermik ilinniarfinnut attaveqarluarnissarput kommunalbestyrelsimit pingaartipparput. Ullutsinnimi silarsuaq ammavoq, periarfissarpassuaqarpoq utaqqiinnartunik. Taamaammat ilinniarfik manna kissaapparput ajunngitsunik sunik tamanik.
Naggataatigut Maniitsormioqatikka tamaasa kajumissaarusuppakka nipilersornerup illua manna paarilluarniaqqullugu. Qanortorlu pitsaasumik siunissaqarnissaa isumassinniittuarili, nunaqqatigiimmi tapersersunngippanni illu manna affaannarmillusooq atuutissaaq.
Borgmesterip viceborgmesterillu pilluaqqussutaat inuulluaqqussutaallu matumuuna apuuppakka. Illup matuma ingerlalluarnissaanik kissaappaasi.
Kingumut pilluaritsi Maniitsup nipilersornermik ilinniarfeqalerneranik.
Taamatut oqaaseqarlunga Maniitsumi Nipilersornermik Ilinniarfik pisortatigoortumik ammarpara.
Qujanaq.
Siverth K. Heilmann, kommunalbestyrelsimut ilaasortaq, Borgmesterip tulliata aappaa, Maniitsoq
Ulloq 12. februar 2016
Siverth K. Heilmann, Borgmesterip tulliata aappaa.
