Isumasioqatigiissitsinermi qitiusumik eqqartorneqarput suliffissanik nutaanik amerlanerusunik pilersitsiniarnermi periarfissat nutaat, kiisalu suliffeqarfiit aalajangersimasut sulisussaqar-niarnikkut ajornartorsiutaat iluarsiiviginiarlugit iliuuserineqartarsinnaasut.
Borgmesteri Hermann Berthelsen oqaaseqarpoq: ”Nuannaarutigaara isumasioqatigiissitsineq iluatsilluarmat. Isummat isumassarsiallu qaffakaatinneqarput. Aamma nuannaarutigaara Maniitsumi suliffissuit pingaarnersaanni Royal Greenlandip aalisakkerivissuani sulisussaqarniarnikkut ajornartorsiutit qanoq iluarsiivigineqarsinnaanerat eqqartorluarneqarmat. Aalisartut aamma Royal Greenlandip aalisakkerivissuata kissaatigaat sinerissamit nunanillu allanit Maniitsumut tikisitsisoqartalernissaa. Oqariartuutaat kommunalbestyrelsip tungaanit tusaavarput.”
Suliffissaaleqisut inissisimanerat pingaartitaallu aamma eqqartorneqarput. Suliffissaaleqisut marluk saqqummeeqataanerat tigulluarneqarpoq.
Inuussutissarsiutinut suliffissaqartitsiniarnermullu ataatsimiititaliap siulittaasua Aqqalu Skifte ilaatigut oqaaseqarpoq: ”Suliffissaaleqisut Piareersarfimmi naapitinneqalaartarnissartik aammalu imminnut ikorfartoqatigiiutigalutik oqaloqatigiissinneqartarnissartik pisariaqartippaat. Illoqarfiup iluani aamma asimi saligisinnaanerit oqariartuutigineqarput soqutigineqarlutik.”
Isumasioqatigiissitsinermi kalaaliminernik tunisassiorfiup Lilleholmip pilersaarutai aamma sammineqarput.
Unnukkuani suliffissaqartitsiniarneq pillugu Katersortarfimmi innuttaasunik ataatsimiititsisoqarmat oqallittoqavissorpoq.
Isumasioqatigiissitsineq angusaqarfiulluartoq aasaru aggustip naajartornerani Sisimiuni ingerlanneqartussamik malitseqartinneqassaaq.
Saaffigisassaq:
Aqqalu Skifte, kommunalbestyrelsimi ilaasortaq
Mobil nr. 52 33 79